2020-01-26

GATZATUEN POTEAK MARGOTZEN


Beste batzuetan baino familia gutxiago elkartu ginen joan den ostiralean, baina umeek zein gurasoek, beti bezain ondo pasatu zuten. Urreta ikastetxean elkartu ziren, gatzatuen poteak koloreztatu eta luzaroan iraungo dien landare bat landatzeko. Materiala Sergiok eta Nirak eraman zuten, eta primeran eman zizkiguten argibideak, gure lagun berriek hemendik 10 urtera bizirik jarrai dezaten.


 Birziklapenaren garrantzia ikasi dugu, berriz ere, ikastaro polit honetan, zaborrera botatzekoak ziren poteei bigarren erabilera eman baitiete gure txikiek. Eramandako akuarelei esker, estilo askotako lorontziak margotu zituzten: abstraktuak, izendunak, mendia edota animaliak agertzen zirenak...Hori bai, den-denak oso koloretsuak eta zein baino zein politagoa!



10 kolore izan zuten aukeratzeko, baina koloreak nahastuz, beste gama batzuk sor daitezkeela ere gogoratu genuen. Gorria eta berdea, marroia; Gorria eta horia, laranja...Haurtzarora bueltatu ziren guraso batzuk!
Poteak ez ezik, orri zurietan ere gauza  politak sortu zituzten umeek. Gaur egungo artea modernoa ezagututa, batek daki, agian etorkizunean Guggenhein museoan ikusiko dugu baten bat. Beraz, badaezpada, ez bota!


Poteen margoa sikatu behar zen, eta denok dakigu txikiek pazientzia gutxi daukatela. Bada, pinturatik antzerkira egin zuten salto, inork ezer esan barik. Izan ere, eskolako areto-nagusiak daukan antzeztokira igo eta gortinen atzean buruari ez eragitea ez da batere erreza izango. Agian, poteekin baino hobeto pasatu zuten aktorearena egiten. Batean zein bestean, argi geratu zen sormen handiko harrobia dagoela herrian.


Txalo bero bat Nira eta Sergiori, zuek ere artista hutsak zarete!

2019-12-31

GABONETAKO APAINGARRIAK PRESTATZEN

Urteari agur esateko tailer dibertigarria antolatu zuten Galdakaoko gurasolagunek joan den ostiralean. Oporretan egon arren, atsedenik ez hartzea erabaki zuten familiek, eta umeek ze ondo pasatu zuten ikusita, bistan da erabaki ona hartu zutela. AEKn elkartu ziren animatu ziren zazpi familiak, eta gabonetako izei polit bana egin zuten, senideak bisitan doazenean, etxean dotore-dotore luzitzeko.



Izeia izan zen protagonista nagusia, baina eskulana hasi aurretik, Olentzeroren irudi bat margotzen ere aritu ziren gure txikiak. Birziklapenaren balioa nabarmentzen saiatzen gara beti, eta hilabete honetan, komuneko paperaren tutua erabili dugu enborra egiteko. Kartulina berde zati txiki bat eta purpurinaz jositako papera izan dira nahikoak arbolari eta zintzilik jarritako bolei forma emateko.


Sorpresa bi izan genituen lehengoan. Alde batetik, Euskara Zerbitzuak meriendarako poltsa bana oparitu zien umeei. Barruan, margo eta karamelu batzuk sartu zizkien, eta umeak poz-pozik joan ziren etxera. Bestetik, Susanak etxetik ekarritako "Elur malutak" eta "Olentzero eta astoa" gabon-kantak abestu genituen.Eskolan landu zuten umeek koreografia, eta ikasitakoa praktikan jarri zuten, helduon gozamenerako.

Txalo bero bat Itxaso eta Norari, ostiraleko tailerra gidatu zuten artistak!!!
Hurrengo hitzordua urtarrilaren 24an izango da. Animatuko zara?

2019-12-17

BASAURIKO GURASOLAGUNAK PINGUINOAK EGITEN


Kosta zaigu elkartzea, baina azkenean lortu dugu 2019/2020 ikasturteko lehen  Gurasolagun tailerra egitea Basaurin. Guraso eta seme-alaba berriek izena eman dute, eta guztientzako egun aproposa topatzea izan da zailena, baina itxaroteak merezi izan du.
Goiko argazkian ikusten den legez, negua gainean dugunez pinguino barregarriak egitea izan genuen helburu, baita lortu ere! Esan beharra dago ideia Galdakaoko Gurasolagunei hartu diegula, beraz, ezer baino lehen, eskerrak ematea dagokigu!


Tailerrari dagokionez, egiteko erraza eta dibertigarria izan zela aitortu behar dugu; gainera, familia bakoitzaren irudimenari bide eman zion, norberak pinguinoei apaingarri bereziak jarri zizkion eta. Hasteko, familia bakoitzak etxetik 2 ur botila txiki ekarri zituen, pinguinoen gorputzak izango zirenak. Ondoren, umeak hasi ziren gorputz hori kotoiz betetzen: poliki-poliki baina gelditu gabe. Bitartean, gurasoak fieltro eta gomaeva beltza mozten hasi ziren, pinguinoen "jantzia" izango zena, noski, "animaliaren" gorputzaren tamaina kontuan hartuz. "Jantzia" botilara itsasteko silikonazko pistolak erabili genituen, eta egia esan oso ongi funtzionatu zuten: azkar eta egoki itsatsi ziren.
Behin gorputza beteta eta jantzia jarrita, familia bakoitzak osagarri ezberdinak gehitu zizkion norbere gustu eta irudimenaren arabera: mokoa eta oinak egiteko gomaeva laranja, kartulina marroiarekin kapela, artilearekin tapauka, ohial zatiekin gerrikoa...

Lehen aipatu bezala, familia bakoitzak bi botila ekarri zituen, hortaz, lehen pinguinoa amaitzean bigarrena egiteari ekin zioten, oraingo honetan azkarrago, mekanismoa barneratuta baitzeukaten dagoeneko. Aitortu behar dut azken emaitzak uste baino ederragoak izan zirela, material gutxi erabiliz eta sinple-sinple emaitza txundigarriak lortu daitezkeen seinale!!

Poz-pozik amaitu zuten gure familiek, eta Gabonak pasa ostean berriro elkartuko garela promestu genion elkarri. Zein izango ote da hurrengo eskulan edo tailerra? Gurekin parte hartu nahi duzu? Bada adi ibili eta segi ezazu gure bloga, bertan iragarriko baitugu! Ordurarte, ongi pasa Gabonetako oporrak eta asko jolastu euskaraz!

PRAKTIKATU ETA BIZI!

BASKOT GAUA



Urtero bezala, Gabonak iristen direnean Hego Uribeko berbalagunek eta Aek-ko ikasleek gauza bi baino ez dituzte buruan: bata, Baskot Gaua, eta bestea, argi dago: KAPELA!! kar, kar, kar

Helburua jai parte hartzailea egitea izaten da, eta horretarako partaideek taldeka kapela bat egin behar dute festara eramateko. Aurtengo gaia "URTAROAK" izan da, eta horren inguruko kapela desberdin ugari ikusi genituen pasa den ostiralean: udazkena irudikatzen, lau urtaroak...buruari eragin zioten behintzat!!

Hasteko, Basauriko kaleetatik poteoa  egin genuen, motorrak berotu eta giroa animatzeko ( bide batez, basauriarrek ikus gintzaten). Pote bi hartu ostean, San Jose ikastetxera abiatu ginen, festaren mamia bertan baikeneukan prest.

San Jose ikastetxe barruan jatekoa eta edatekoa zuten prest Berbalagun eta ikasleek. 45 minutuz jaten, edaten, hitz egiten...egon ostean,benetako jaiari hasiera eman genion: Taupaka sortzaileen elkartearen partez etorritako Txikik egindako bakarrizketa eta ikasle eta berbalagunek prestatutako koreografia mundialak!!

(bakarrizketa hasi aurretik)


Argazki honetan ikus daiteke Txiki, bakarrizketa egin zuen artista, zentzu on guztietan, jaialdia bideratzen, gu guztiok barre algaraka aritu ginen bitartean. Oso originala eta dibertigarria izan zen, eta hasiera mailan dauden ikasleentzako oso aproposa, hizkera behe urratsetara moldatzeaz gain, gure belaunaldiko kontuen inguruan aritu baitzen, denok identifikatuta sentituz!
Ordubete pasatxo barrez lehertzen aritu eta gero, koreografien ordua iritsi zen. Taldeka atera ziren gure partaide animosoak, eta ordura arte nahikoa barre egin bagenuen ere, hortik aurrerakoa izugarria izan zen! Basaurin euskara eta umorea badabiltza!! Eta lotsa gutxi...kar,kar,kar
Bukatzeko, kapela onena eta koreografia onena saritu ondoren, koreografia irabazlea denon artean dantzatu genuen festari amaiera emateko. Hurrengo urtean itzuliko gara euskaraz gozatzeko asmoz!!

PRAKTIKATU ETA BIZI!