2019-06-24

EUSKAL TRIBIALA

Nai Lua teterian izan zen hitzordua, ekainaren 14an, arratsaldeko 20etatik aurrera. Basaurin "Tribial" jolasa euskaraz egiteko lehen saiakera zen eta ez genekien ziur jendeak erantzungo ote zuen. Baina 20 Berbalagun agertu ziren jolasteko eta ondo pasatzeko asmoz, eta sentsazio oso positiboa utzi zigun saiakerak.

Agertutako partaideak 5 taldetan banatu genituen eta jolasa azaldu genien: proiektorean ikusiko zituzten galderak eta gero erantzunak denon artean ikusiko genituen proiektorean, tranparik egon ez zela ziurtatzeko. Galderak 3 multzotan banatu genituen, eta multzoko 10 galdera izan ziren: aktualitatea, kultura orokorra eta ikus-entzunezkoak (bideoak, abestiak...).

Dinamizatzaileak galderak ozen irakurtzen zituen proiektorean agertzen ziren une berean, eta minutu/ minutu eta erdiko tartea zuten taldeek erantzuna paperean idazteko. Horrela lehen galdera sorta bukatu arte. Ondoren, denon artean erantzunak ikusi genituen eta talde bakoitzaren puntuazioa apuntatu genuen.
Lehen bi multzoak osatu ostean, atsedenaldia egin genuen nahi zuenak zigarroa erre zezan, edo hankak luzatu zitzan. Eta azken multzoari ekin genion, interesgarriena iruditu zitzaiena: bideoak, abesti zatiak, filma batzuen elkarrizketa zatiak...izan zituzten ikusgai eta entzungai, eta horiek baliatuz proposatuta galderak erantzun zituzten.  Amaieran, talde irabazle eta galtzaile bana egon zen, eta sari eta zigorra, noski: irabazleek Praktikatu zerbitzuko poltsa ekologikoak eraman zituzten, galtzaileek, berriz, karaokea egin behar izan zuten.

Harrera ona ikusita, uda ostean hilean behin egitea aurreikusi dugu ea horrela Basauriko euskaltzaleen artean erreferente izatea lortzen dugun, eta hala, euskaraz gozatzeko beste aukera bat eskaintzen dugun. Urrian gehiago!!
Praktikatu eta bizi!

GURASOLAGUN MAGIA SAIOA

Ikasturte honetan Gurasolagun martxan jartzea lortu dugu, eta sei saio antolatu ditugu gure artean. bada, amaiera emateko Magia saioa egitea erabaki genuen, umeek horrekin asko disfrutatzen dutela jakinik.

Hitzordua ekainaren 10ean izan zen, arratsaldeko 17:30etik aurrera, Bolintxu euskaltegian. AEK-k Urtxintxa Eskolarekin duen akordio bati esker lotu genuen saioa eta magoa: Ibon Magoa izan zen umeei, eta helduoi, arratsalde ona pasarazi zigun profesionala.

Berez, gainera, ez zen magia saio konbentzionala izan: magia trikimailuak egin zituen denok aho zabalik utziz, baina horretaz gain, guk etxean edo lagunen aurrean egiteko batzuk erakutsi zizkigun: makiltxoen sekretua, klipa eta goma, plastikozko "lastotxoaren" trukoa... Poz-pozik joan ginen etxera, magia ikusteaz gain, magia egiten ere ikasi baikenuen!!

Ikasturtea bukatzeko modu ezin hobea izan zela aipatu nahi dugu, eta indarrez bete zirela partaideak uda ostean ere ekimen polit bezain beharrezko honekin segitzeko. Lanean jarraituko dugu, familien arteko hizkuntza ohiturak aldatzeko saiakera zoro baina eder honekin!
Praktikatu eta bizi!!!

POTEOTALDEA SAGARDOTEGIAN

Aurten ezin izan dugunez sagardotegira irteera orokorra antolatu, ostiraletan elkartzen den poteo taldeetako batek Santutxuko Galtzagorri sagardotegira joatea erabaki zuen, ohitura hori oso gogoko baitute.

Hitzordua ekainaren 8an izan zuten, eta arrastiko 19etan Basaurin zurito bat hartu ostean metroz hurbildu ziren Bilboko auzorantz . Taldean 10-12 lagun inguru elkartzen dira eta horiexek joan ziren ondo afaldu eta barre egiteko gogoz.

Galtzagorrin giro ona aurkitu zuten eta menu klasikoa eskatu zuten: txorizoa sagardotan,odolostea, bakailao tortilla, txuleta eta postrerako gazta eta irasagarra.Horrekin batera, noski, sagardoa edateko aukera lehertu arte!! Eta hantxe aritu ziren gustura asko, menu gozoaz eta sagardoaz gozatzen.

 Afalostean Basaurira itzuli ziren parrandarekin segitzera eta antza ondo pasatu zuten, gaueko ordu txikiak arte geratu baitziren tabernaz taberna, kar kar kar! Eta promesa bat eginarazi didate: datorren ikasturtean Gipuzkoako sagardotegi batera joango gara egun pasa!! Egin beharko...
Praktikatu eta bizi!!

2019-06-18

USANSOLOKO GURASOLAGUNAK LUDOTEKAREKIN BATERA


Martxoaren 22an elkartu genituen lehenengoz Usansoloko familiak Gurasolagun proiektuan, eta atzo esan genion agur mugarria izatea espero dugun urteari. Aurreko batean Urtxintxa eskolakoek erakutsi ziguten zein erraza den eskulan dotoreak egitea, eta oraingo honetan, geu ere horrelako gauzak egiteko gai garela demostratzea tokatu zaigu.




Atzoko eguna berezia izan zen, tailerra Usansoloko Ludotekarekin elkarlanean antolatu genuen eta. Zeinen txukun aritu ziren Miren eta bere laguntzaileak umeentzako jolasak prestatzen eta umeei tailerrean laguntzen! Plazer bat da horrelako jendearekin lan egitea!
Dena zegoen prest 16:00etarako. Material guztia mahaietan utzi eta puxikekin dantzan hasi ginen, frontoi txikiaren gerizpea aprobetxatuz






Ondoren, umeak eta gurasoak parez pare jarri genituen, eta zoologiko ederra sortu zen. Izan ere, hainbat animaliaren fitxa bana eman genion talde bietako partaideen artean, gerora, gurasoen imintzioei esker, bere bikotea topa zezaten. Ikustekoa izan zen gorila, astoa, txerria eta bestelako animaliak nola imitatu zituzten gurasoek. Kar, kar, kar!




Motorrak berotuta, eskulanari ekin genion. "Aurpegi bihurriak" izenburua jarri genion atzoko tailerrari, baina estresaren kontrako aurpegiak ere dei geniezaiokeen, puxika barruan sartutako irinak oso ukimen goxoa eman baitzion pilotari. Aurpegiei ile apur bat jartzeko artilea eta begi, aho eta sudur formako pegatinak nahikoak izan ziren, aurpegi bihurriak irudikatzeko.





Umeen arropa garbigailura joango zen zuzenean, baina pilota hauek bezain irribarretsu amaitu zuten eguna eta baita kurtsoa ere, eta horixe da garrantzitsuena.



Datorren ikasturtean eskarmentu eta gogo handiagorekin bueltatuko gara.
Beraz, adi, zeuk ere parte hartu nahi baduzu, zure zain egongo gara eta


2019-06-08

GURASOLAGUNAK ARRATSALDE PASA PEPETON



Hasiera batean, AEKn landu behar genuen atzoko tailerra, baina azkenean, zuhaitz artean eman genuen arratsalde osoa. Izan ere, aspaldi ez bezala, eguraldia lagun izan genuen (ez hotz, ez bero gehiegi), eta eskulanen ordez umeentzako jolasak antolatuta zeudenez, Pepetora joatea erabaki zuten amatxoek, umeen gozamenerako.





Kurtzeko plazatik Pepetora ez dago distantzia luzerik, baina umeak tartean daudenean, badakizue...Bidean aurkitutako edozein harri, lore, hosto analizatu behar gure txikiek. Kar, kar, kar! Eta umeen jakin-min hori asetzeko-edo, atzoko planean aurreikusita ez zegoen botanika ikastaro txikia eman zigun Maitek, ibilbidean bildutako urki, haritz, ereinotz, huntz eta bestelako hostoekin



Belar batzuek beheranzkoa sendatzeko balioa dutela ere ikasi genuen bidean. Eta umeek ere probetxuzko zerbait atera nahi izan zuten basotik, bai horixe!  Jolasean hasi baino lehen, batek marrubi bat ikusi zuen eta gehiagoren bila hasi ziren denak. Azkenean, eskukada ederra bildu zuten, Susanak eramandako askaria are goxoagoa izateko. 




Galdakaoko leku eder honek badu umeak liluratzen dituen beste altxor txiki bat: zaldiak eta poniak. "Ez bota harririk zaldiei. Azenarioak eta patatak jaten dituzte" dioen kartel pare bat dago hesian zintzilik. Bada, ondo prestatuta joan ziren txikiak, baina beteta eraman zuten azenario poltsa berehala amaitu zuten lagun berriek. Ze polita izan zen animaliak nola elikatzen zituzten ikustea!




Eta ze polita izan zen Susanak, Maider eta Noraren laguntzarekin, antolatu ziguten plana. Dantza eta jolas batzuk egin eta gero, ederki merezitako meriendarekin borobildu zuen eguna Gurasolagun talde jator honek.

2019-06-04

BASAURIKO GURASOLAGUN: MAGIA SAIOA

Basauriko Gurasolagun 6. saiorako, Urtxintxa eskolarekin elkarlanean, magia saioa antolatu dugu. Saioa ekainaren 10ean izango da, Bolintxu euskaltegian, arratsaldeko 17:30etatik aurrera, eta ordubeteko iraupena izango du gutxi gorabehera.

Urtxintxako eskolakoak arituak eta adituak dira halako saioak antolatzen, hortaz, ziur gaude arratsalde pasa dibertigarria egiteko aukera izango dutela hurbiltzen diren familiek, bereziki haurrek.

Beraz, ez egin planik egun horretarako eta anima zaitez euskararekin eta magiarekin gozatzera!! Gainera, beti bezala, debalde izango da!!

Praktikatu eta bizi!!

2019-06-03

MOZOILO EGUNEAN AEK-KO IKASLEEKIN BATERA

Ostiralean elkartu ginen Usansoloko Gurasolagunak eta larunbatean izan zen Galdakaokoen txanda, zenbait berbalagun eta AEK-ko ikasleekin batera. Elkartzeko aitzakia, euskal nortasuna aldarrikatzeko Galdakaon urtero ospatzen eta antolatzen dugun Mozoilo eguna. Eta jakina, Euskaraldia eta Korrikan bezala, euskararen aldeko mezua zabaldu behar den guztietan geu ere hor egongo gara!


Egitaraua oso zabala izan zen, eta adina ez zen oztopoa izan ondo pasatzeko, jolasak, triki-poteoa, berbena eta bestelako ekintzak egon zirelako antolatuta. Baina umeak izan ziren,zalantzarik gabe, gehien gozatu zutenak. Izan ere, 35 graduko bero itogarriari aurre egiteko ez dago iturria, ur-pistola batzuk eta puxikak baino konbinazio hoberik


Bazkaria goxo-goxoa eta bazkalosteko berbena ere kategorikoa. Zer gehiago eskatu behar genion egunari? Datorren urteko hitzordua jarrita dago, baina bien bitartean, umeentzako tailerrak antolatzen jarraituko dugu, noski. Hurrengoa ostiral honetan bertan, hilak 7, 17:30ean, AEK euskaltegian. Atsegin baduzu, bertan ikusiko dugu elkar ;)

2019-06-01

USANSOLOKO GURASOLAGUNAK ETA URTXINTXA ESKOLA

Martxoaren 22an elkartu ginen lehenengoz, eta ederto pasatu genuen arren, harrezkero ez ginen geratu. Tartean, Korrika, Aste Santuko oporrak eta data bat adosteko zailtasuna. Tira, bada, atzo egin genuen bigarren tailerra, eta esan daiteke itxaronaldia merezi izan duela, gure Usansoloko txikiak primeran ibili ziren-eta Urtxintxa eskolatik etorritako Irantzuren gidaritzapean.



Saioa bi tailerretan banatu zen.
Plastilina polimerikaz egindako figurak egiten eman genuen lehen zatia. Kolore guztietako plastilina egonda, edozer egin zitekeen, eta umeek zein helduek irudimen handia dutela erakutsi zuten, beste behin ere. Irantzuk bi eredu ekarri zituen, baina mota guztietako eskulanak ikusi genituen: elefantea, marigorringoa, txerria, dordoka, marrubia, dado bat, pultserak...Artista hutsak!



Forma hartutako plastilina lehorgailu batekin gogortzen utzi eta bigarren tailerrari ekin genion, denborarik galdu gabe. Txotxongilo artean aritu ginen bigarren zatian, eta atzo ere konprobatu genuen material sinplea eta irudimena nahikoak direla eskulan ederrak sortzeko. Zeinen panpina politak egin zituzten poltsa marroi txiki bat eta koloretako kartulina puska batekin!




Asko eman zuen atzoko saioak eta ziur ideia bikainak hartu dituztela gurasoek hurrengo tailerrak eurek gidatzeko. Laster ikusiko dugu elkar!

EKAINEKO AGENDA


2019-05-29

EUSKAL TRIBIALA

Ez da tribial arrunta izango: Nai Lua teterian elkartuko gara, eta
taldeka jarri ondoren, proiektorean galderak egingo ditugu, 3 multzotan
banatuta: gaurkotasuna, kultura orokorra eta ikus-entzunezkoak. Multzo
bakoitzak 10na galdera ditu, eta multzoen artean atsedenaldia egingo
dugu nahi duenak zigarroa erre eta antolatzaileok erantzunak zuzentzeko.
Horrela, amaitu arte.

Ondoren, erantzunak bozgora irakurriko ditugu denon artean, eta
irabazleak saritxo bat lortuko du. Galtzaileek ere beste "saritxo" bat
izango dute; karaokean abestu beharko dute jai bukaerako abestia.

ANIMATUKO PARTE HARTZERA?

2019-05-27

HEGO URIBEKO MENDILAGUNAK BOLINTXUN

Negu ia osoa irteerarik egin gabe egon ostean (salbuespenak salbuespen),  Hego Uribeko mendilagun taldea berriro ere elkartu eta animatu gara txango eder bat egitera. Oraingo honetan Bilbon geratzen den paraje natural bakarrenetarikoa bisitatu genuen: Bolintxu ibaia eta bere inguruak.

Bolintxu ibaia Pagasarri eta Arnotegi mendien artean kokatzen da, eta baso zahar eta autoktono batek inguratzen du. Paisaia ikusgarria da benetan, eta gezurra dirudi Bilbotik 10 minutura halako eremu natural ederraz gozatzeko parada izatea. Bada, zonalde magiko hori arriskuan dago, agintari bihozgabe batzuei aproposagoa iruditu baitzaie bertatik autopista ustel eta triste bat igarotzea...Horregatik aprobetxatu nahi izan dugu asteburu hau, hemendik gutxira ez baitakigu bizirik segituko duen.

Gure ibilaldia Basauriko udaletxean hasi genuen, eta Malmasin mendirantz abiatu ginen. Berau inguratu ostean, Buia auzotik Pagasarrira igo ginen poliki-poliki, Euskal Herrian hain ohikoa den behe-laino eta langarrak lagunduta.
Bilbotarren mendi maitatuko tontorra zapaldu ostean, bertako aterpe-tabernan indarrak berritu genituen: fruitu lehorrak, tortilla pintxoak, garagardoa... Behin pilak kargatuta, jaitsierari ekin genion Bolintxurantz, eta hango "ur-jauzian" argazkia atera ondoren, Abusu auzora jaitsi ginen. Bertan, txibierro batzuk jan genituen zurito batek lagunduta, eta poz-pozik abiatu ginen etxera, goiz ederra eman genuela jakinda.
BOLINTXU BIZIRIK!!!!!
   

GOMAEVAREKIN JOLASEAN

Artista ederrak dira gure Gurasolaguneko ama eta umeak argazkian ikus daitekeenez! Ederki pasa zuten aurrekoan ere, "gomaevarekin" jolasean.
Argazkian ikusten denez, gomaeva erabilita mahai jokoak egitea zen ideia, baita lortu ere.

Hasteko, familia bakoitzak etxetik 9 plastikozko tapoi ekarri zituen, eta erabiliko zuten gomaeva kolorea aukeratu ostean, lanari ekin zioten: mahai jokoaren neurria erabaki eta moztu, tapoiak apaintzeko aukerak hausnartu eta gauzatu, forma diferentea eman...

Tapoiak apaintzeko marmoka irudiak, "comecocos"-ak eta marigorringoak egin zituzten eta denek aukeratu zuten jokoa " 3 lerroan"  izan zen. Jokoan dauden "marrak" egiteko beste kolore bat aukeratu zuten eta kolaz ondo itsatsi ondoren lana amaitua zegoen!!

Jolastea besterik ez zen falta, eta argazkia atera eta gero, horretan aritu ziren binaka. Arratsalde ederra eta oso eskulan gomendagarria izan zen, erraza eta dibertigarria baita!
Hurrengo saioa ekainaren 10ean izango da, betiko orduan, 17:30ean, Bolintxu euskaltegian. Urtxintxa elkartekoak etorriko zaizkigu magia erakustaldia egitera! Animatuko?
Praktikatu eta bizi!!!



2019-05-20

BASAURIKO V. MINTZODROMOA

Aurten Basauriko V. Mintzodromoa ospatu dugu eta azpimarratu nahi dugu aurten ere arrakasta handia izan duela! Apurka-apurka baina lortzen ari gara Basauri gero eta euskaldunago eta euskaltzaleago egitea!

Basaurin ohitura den bezala, bi saio antolatu genituen; bata goizeko 10:30etatik 12etara, eta bestea, arrastiko 18:30etatik 20etara, Solobarria plazan. Horri esker, jende kopuru handia biltzeaz gain, herriari ikusarazi diogu proiektua; horren adibide da pertsona ugari galdetzera etorri zitzaigula zertan ari ginen, parte hartu zezakeen...eta batek baino gehiagok momentuan izena eman zuen.
Lehen aipatu bezala,goizeko saioari hasiera 10:30etan eman genion eta hizlariek indarra har zezaten, lehenik eta behin, kafea eta pastak hartzeko aukera izan zuten. Horren ostean, ordubete inguru eman zuten aurten proposatutako gaien inguruan euren iritziak plazaratzen: "Oporrak", maila baxuagoa zutenei konfiantza emateko; " Hiritar zintzoa al zara?"; izenak dioen bezala gure portaeren eta jokabideen gaineko hausnarketa egiteko eta "Apustu etxeen arazoa" izan zen bukaera eman zion gaia; gaur egun dagoen adikzio larrienetariko bati buruz hitz egiteko. Gaiak aproposak iruditu zitzaizkien eta horren seinale da, goizean hurbildu ziren 120 lagunei labur egin zitzaiela saioa!

Arrastian ere, koadrila polita elkartu zen Solobarria plazan, 105 bat lagun, eta goizeko dinamika berberean aritu ginen; kafea, ura, pastak, mihia dantzan jarri...ederki egon ziren bertara hurbildu ziren ikasle, berbalagun eta euskaltzaleak!
Hortaz, aurten ere helburua lortu dugu; ekitaldi arrakastatsua egin dugu, eta ez kopurutan soilik ( 220 lagunetik gora), emandako itxura, hartutako inertzia eta lortutako atxikipenek hemendik aurrera baikor izaten lagunduko baitigute!! Datorren urterako lanean gaude dagoeneko! Milesker parte hartu duzuen guztioi, zuek gabe horrelako ekintza egitea ezinezkoa bailitzateke!!
Praktikatu eta bizi!! 

2019-05-07

BASAURIKO V. MINTZODROMOA

Kaixo Hego Uribeko euskaltzale guztioi!! Hementxe dugu Basaurin ospatuko dugun 5. Mintzodromoa eta espero dugu ahalik eta jende gehien etortzea. Aurreko ekitaldiak bezala, Solobarria plazan ospatuko dugu, bi saio izango dira, goizez zein arratsaldez, eta euskara kalera atera eta solasaldi jatorra izan nahi duen ororentzat aukera paregabea izango da. Zuen zain gaude!! Gogoratu, izena emateko azken eguna maiatzaren 9a dela!
Praktikatu eta bizi

2019-04-06

GURASOLAGUNAK ERE KORRIKAREN ALDE

Tailer berezia egin zuten atzo Galdakaoko berbalagunek. Korrika ate joka dugu eta guztiok ari gara motorrak berotzen euskararen aldeko lasterketa erraldoiaren alde.

Atzo, Gandasegiko arkupeetan elkartu ginen, taldeko partaideez gain, jende gehiago erakarri nahian. Eta ideia ez zen batere txarra izan, Korrikako kartelek eta musika alaiak jende askoren jakin-mina bereganatu zuen eta



Helburua Korrikaren aldeko marrazkiak margotzea eta Lacasitos poteekin lekuko txikiak egitea zen. Materiala udal langileek eramandako lau mahitan utzi eta berehala hasi ziren txikiak jolasten eta baita poteak husten ere! Lekukoak egiteko gurasoen laguntza behar izan zuten txikienek, baina, beti bezala, lan-talde ederra osatu zuten denek.






Hauxe da atzoko tailerraren azken irudia: Umeak pozik, ahoan zapore goxoa eta Korrikaren aldeko mezuak nonahi.

Asteartean Korrika txikian eta asteazkenean Korrikan, umeek zein helduok lau haizeetara zabaltzen jarraituko dugu euskaraz bizi nahi duen herria garela. Atzera kontua martxan da. Prest zaudete?



Tipi-tapa, tipi-tapa...KORRIKA!!!

2019-03-24

USANSOLOKO BERBALAGUNEN LEHEN HITZORDUA


Kostata, baina martxan da Usansoloko Gurasolagun egitasmoa. Joan den ikasturtean saiakera bat egon zen, baina azkenean taldeak ez zuen formarik hartu. Aurten, ordea, topera hasi dira ostiralean Unkina eskolan elkartu ziren 9 familiak, eta etxera zeinen pozik joan ziren ikusita, ez du ematen berriro elkartzeko denbora luzea joango denik, ez horixe!




Batzuk aspaldiko ezagunak izan arren, elkar ezagutzeko jolas batekin hasi ginen, motorrak berotzeko: armiarma sarea. Norberak zer duen gustuko esan, eta haria beste bati pasatu, amaraun handi bat osatu arte. Eta azkenean, haria pasatu dizunak zer esan duen gogoratu. Izan ere, garrantzitsua da lagun berrien zaletasunen berri izatea


Aulkien jolasean ari aritu ziren txikiak. Korrika ate joka dugu eta horren aitzakian Pirritx, porrotx eta Marimototsen "Txis pun, Korrika" abestiaren erritmoan gira eta biri ibili ziren poz-pozik


Eta Korrikak protagonista izaten jarraitu zuen hurrengo jolasean ere. Lekukorik ez, baina puxika eder bana eman genion familia bakoitzari, euskararen aldeko mezu bat idatzi eta barruan sartzeko. Ondoren, puxika guztiak apurtzen hasi ziren, besteek idatzitako barruko mezua nork idatzi zuen asmatzeko asmoz. Honetan ere izerdi nahikoa bota zuen batek baino gehiagok, merezi izan zuen, mezuak zein baino zein ederragoa zen eta






Eta proiektu honentzat berezia izango den lehen egun hau borobiltzeko, puzzle bat egin genuen guztion artean. Familia bakoitzak zatitxo banari bere lekuan forma eman zion, erdian zegoen kartoia banan-banan kolorez osatu arte. Eta horixe bera da Gurolagunen egin nahi duguna: guraso eta umeen arteko elkarlana etxetik hasi, euskaraz bizi nahi duen familien sarea gero eta handiagoa izan dadin.



Herrengo hitzorduan pasa den ostiralean bezain ondo pasatuko dugu, seguru. Bien bitartean, ondo ibili eta euskara erabili!!!



2019-03-22

IÑAUTERI GINKANA

Ostiral honetan, Korrikaren aldeko poteo musikatuarekin batera, Berbalagunen iñauteri ginkana egingo dugu!!
Taldeka egingo ditugu jolasak, giro ederra egongo da eta gainera, eguraldia lagun!!!
Rapero mozorroa jantzi eta etorri gurekin arrasti ederra pasatzera! Eta ginkana amaitu ostean, San Migel kantariko lagunekin kantu poteo musikatua; plan hoberik duzu?
Praktikatu eta bizi!!

2019-03-01

MARTXOKO AGENDA


ZIZARE-POTEAK EGITEN

Basaurin egin genuen Gurasolagun 4. saioan eskulan praktikoa egitea erabaki genuen: margo, arkatz, artazi eta abar gordetzeko poteak egin genituen, komuneko papereko kartoia oinarritzat hartuz. Gero kartoi horiek elkarrekin lotuz, zizare itxura eman genien poteei; hortik ZIZARE-POTE izena.

Saioa praktikoa izateaz gain, material gutxi eskatzen zuenez, saioa ekologikoa izan zela esan daiteke. Familia bakoitzak etxetik 4-5 kartoi borobil ekarri zituen, eta Berbalagunek jarri zuen gainontzekoa: koloretako kartoiak, kola, artaziak, orri zuriak eta aurreko saioetatik sobera izan ditugun "gomaeva", haria, plastikotxoak...ere erabili genituen.

Hasteko, etxetik ekarritako kartoiak kartulinaz estali zituzten gure familiek; batzuek 5 kartoi zatiak kolore berdinarekin "forratu" zituzten, beste batzuek, aldiz, kolore desberdinekin. Behin kartulina ondo itsatsita zegoela, kartoi zatiak lotu genituen grapagailuarekin, grapa bat goian, beste bat behean.
 Argazkian ikus daitekeen moduan, pote bakoitzari apaingarriak edo marrazkiak egin zizkioten, pote dibertigarriago eta politagoak sortuz. Hor norberak bere sormena eta ideiak garatu ahal izan zituen, eta azken emaitzak askotarikoak izan ziren.


 
Ondoren, azken ukituak egitea bakarrik falta zuten; poteei beheko zatian estalkia jarri zieten, pote funtzionalak izateko. Horretarako, "gomaeva" zatiak, beste kartulina zati batzuk, kartoi lodiagoak...erabili zituzten. Bukatzeko, zizarearen aurreko zatiari aurpegi itxura eman zieten, itxura alai eta jatorra emanez.
 bibotedun zizarea :)
marigorringoa :)

Beste batzuek ilea jarri zioten poteei, eta argazkietan ikusten denez, emaitza ona, dibertigarria eta  originala izan zen, eta gainera, egiteko erraza!! Umeak poz-pozik joan ziren etxera euren margoak gordetzeko pote berriekin, eta gurasoek ere arrasti lasai pasatu zuten euren umeei laguntzen.

Hurrengo hitzordua lotzeke dago, beraz, egon adi!! Informazioa zabalduko dugu, eta gurekin disfrutatzera animatuko zaitugu!! Praktikatu eta bizi!!