2019-03-22

IÑAUTERI GINKANA

Ostiral honetan, Korrikaren aldeko poteo musikatuarekin batera, Berbalagunen iñauteri ginkana egingo dugu!!
Taldeka egingo ditugu jolasak, giro ederra egongo da eta gainera, eguraldia lagun!!!
Rapero mozorroa jantzi eta etorri gurekin arrasti ederra pasatzera! Eta ginkana amaitu ostean, San Migel kantariko lagunekin kantu poteo musikatua; plan hoberik duzu?
Praktikatu eta bizi!!

2019-03-01

MARTXOKO AGENDA


ZIZARE-POTEAK EGITEN

Basaurin egin genuen Gurasolagun 4. saioan eskulan praktikoa egitea erabaki genuen: margo, arkatz, artazi eta abar gordetzeko poteak egin genituen, komuneko papereko kartoia oinarritzat hartuz. Gero kartoi horiek elkarrekin lotuz, zizare itxura eman genien poteei; hortik ZIZARE-POTE izena.

Saioa praktikoa izateaz gain, material gutxi eskatzen zuenez, saioa ekologikoa izan zela esan daiteke. Familia bakoitzak etxetik 4-5 kartoi borobil ekarri zituen, eta Berbalagunek jarri zuen gainontzekoa: koloretako kartoiak, kola, artaziak, orri zuriak eta aurreko saioetatik sobera izan ditugun "gomaeva", haria, plastikotxoak...ere erabili genituen.

Hasteko, etxetik ekarritako kartoiak kartulinaz estali zituzten gure familiek; batzuek 5 kartoi zatiak kolore berdinarekin "forratu" zituzten, beste batzuek, aldiz, kolore desberdinekin. Behin kartulina ondo itsatsita zegoela, kartoi zatiak lotu genituen grapagailuarekin, grapa bat goian, beste bat behean.
 Argazkian ikus daitekeen moduan, pote bakoitzari apaingarriak edo marrazkiak egin zizkioten, pote dibertigarriago eta politagoak sortuz. Hor norberak bere sormena eta ideiak garatu ahal izan zituen, eta azken emaitzak askotarikoak izan ziren.


 
Ondoren, azken ukituak egitea bakarrik falta zuten; poteei beheko zatian estalkia jarri zieten, pote funtzionalak izateko. Horretarako, "gomaeva" zatiak, beste kartulina zati batzuk, kartoi lodiagoak...erabili zituzten. Bukatzeko, zizarearen aurreko zatiari aurpegi itxura eman zieten, itxura alai eta jatorra emanez.
 bibotedun zizarea :)
marigorringoa :)

Beste batzuek ilea jarri zioten poteei, eta argazkietan ikusten denez, emaitza ona, dibertigarria eta  originala izan zen, eta gainera, egiteko erraza!! Umeak poz-pozik joan ziren etxera euren margoak gordetzeko pote berriekin, eta gurasoek ere arrasti lasai pasatu zuten euren umeei laguntzen.

Hurrengo hitzordua lotzeke dago, beraz, egon adi!! Informazioa zabalduko dugu, eta gurekin disfrutatzera animatuko zaitugu!! Praktikatu eta bizi!!





2019-02-25

MARGOAK GORDETZEKO "MINIONS" ITXURAKO POTEAK


Azken urteotan itsasoan dagoen zikinkeria ikusita, plastikoak edukiontzi horira botatzearen garrantzia gogorarazten digute behin eta berriz, eta halaxe egiten dugu gehien-gehienetan. Batzuetan, ordea, beste erabilera bat eman diezaiokegula ikusi zuten Gurasolagun taldeko familiek, Torrezabel Kultur Etxean egindako lehen tailerrean.




Hustutako Pringels pote bat, kartulina zati bi, pegamentoa eta artaziak. Horixe izan zen ostiralean batu ziren lau familiek Minions itxurako pote ederrak egiteko erabilitako materiala. 

Veronica eta Anderren gidaritzapean aritu ziren txikiak eta baita argazkian agertzen ez diren guraso lotsatiak. Euskaraz goxo-goxo lagun artean egoteaz gain, birziklapena dibertigarria ere izan daitekeela ikasi dute gure txikiek. Hori bai, orain ez daitezela egunero etorri, birziklatzearen aitzakian, litxarreriak erosteko esaten. kar, kar, kar!

Hilabete honetakoa kitto!
Bistan da gure kideek gustua hartu dietela eskulanei, eta ziur orain arte bezain gogotsu jarraituko dutela ekainera arte. Eskerrik asko Veronica eta Anderri. Hurrengo hitzordua martxoaren 29an

2019-02-19

ZIZARE-POTE TAILERRA BASAURIN

Gurasolagunen 4.saioarekin gatozkizue!! Oraingo honetan, errotuladore, margo, arkatzak eta abar gordetzeko poteak egingo ditugu komuneko paperaren kartoiarekin, baina ez edozein pote, zizare itxurako pote ilara baizik!!
Horretarako, partaide bakoitzak etxetik  komuneko papereko 4-5 kartoi borobil ekarri beharko ditu, eta kartulinaz apaindu ondoren, bata bestearekin lotuko ditugu, zizare itxura emanez.

Hitzordua: otsailaren 25a, astelehena, arratsaldeko 17:30ean, Bolintxu euskaltegian.
Ekarri beharrekoak: komuneko papereko 4-5 kartoi ale. Beste material guztia bertan aurkituko duzue.
Animatuko gurekin?
Praktikatu eta bizi!!

2019-02-15

MAKARROIEKIN LEPOKO ETA PULTSERAK EGITEN

Uste genuena baino zailagoa izan zen Basaurin ospatu genuen Gurasolagunen 4.saioko egitekoa: pultserak eta lepokoak makarroi forma desberdinekin egin genituen.
Hasteko, makarroiak atzazalak margotzeko pinturekin eta "carioca" margoekin koloreztatu genituen; ez zen 5 minutuko lana izan!! Pinturak lehortu ostean, "loctite" eta kola zuriarekin makarroiak itsatsi genituen, bakoitzak nahi zion itxura emanez. Lan hori are nekezagoa izan zen, makarroiak ez baitziren ondo itsasten! Halere, pazientzia eta umorea lagun, azkenerako lortu genuen.
Ondoren, haria edo soka makarroietatik pasatzen hasi ginen, poliki-poliki, aurretik emandako forma apurtu ez zedin. Behin makarroi guztiak pasata, soka lotu genuen (korapiloz, kolaz...) eta apaingarriak jarri genizkien lepokoei: margoekin azken ukituak, lazoak jarri, korapilo koloretsuak...
Goiko argazkian ikusi daitekeenez, trebeenek lepokoa eta pultsera egiteko astia izan zuten, beste batzuek, ordea, bata edo beste soilik. Alabaina, partaide guztiak pozik atera ziren, bertan eman genuen ordu eta erdian ederki pasatu baitzuten. Gainera, hurrengo egunean eskolara eraman zituzten egindako "arte lanak", harro-harro!
Argazki gehiago:

Hurrengo saioa otsailaren 25ean egingo dugu Bolintxu euskaltegian, betiko orduan: arratsaldeko 17:30etatik aurrera!! Hurrengo saioan errotuladore eta margoak gordetzeko zizare-potea egingo dugu, komuneko papereko kartoia oinarritzat hartuta!! Animatuko??
Praktikatu eta bizi!



ARGAZKILARITZA TAILERRA BASAURIN

Argazki kamera duzu, baina ez dakizu ongi erabiltzen? Ezagutzan sakondu nahi duzu?
Bada, aukera bikaina ematen dizu Berbalagunek zure kamera ondo erabiltzen ikasteko. Ekarri zure kamera ( reflex, normala, telefonoa bera...) eta ikasi etekin handiena ateratzen!! Klase teorikoa izango da, eta egunean bertan ez bada, hurrengo astean, ikasitakoa praktikan jartzeko aukera izango duzu!!
Hitzordua otsailaren 27an izango da Basaurin, Pozokoetxe Kultur Etxean, 17etatik 19etara edo 18etatik 20etara, ordua oraindik zehazteke.
Izena emateko azken eguna, otsailaren 25a izango da. Anima zaitez!!!
Praktikatu eta bizi!!

2019-02-04

GURASOLAGUN BASAURIN: LEPOKOAK ETA PULTSERAK MAKARROIEKIN

Datorren astelehenean, otsailak 11, Basauriko 3. Gurasolagun saioa gauzatuko dugu Bolintxu euskaltegian, arratsaldeko 17:30etatik aurrera. Bertan, makarroiak eta abar erabiliz, lepoko eta eskumuturreko politak egingo ditugu. Izena emateko azken eguna astelehena bera izango da. Hori bai, saiatu asistentzia baieztatzen, logistika dela eta.
 Familia bakoitzak makarroi kilo erdia ekartzea nahikoa izango da, behar diren beste  materialak Berbalagunek jarriko baititu: haria, kola, margoak...
Hortaz, animatu eta jarrai dezagun guraso eta umeen arteko hizkuntza ohiturak aldatzen, edo hobeki esanda, euskaratzen!
Praktikatu eta bizi!!


ELURREZKO PANPINAK EGITEN

Basaurin egin genuen Gurasolagun 2.saioa ere oso arrakastatsua izan zen, izan ere, 8 familia elkartu ginen, aurreko saioan baino 3 gehiago, eta guraso, eta batez ere umeek, ederki pasatu zuten.
Oraingo honetan, geneukan eguraldia ikusita, apropos ikusi genuen elurrezko panpinak egitea; hori bai, arroza eta galtzerdiak oinarri hartuta, ez elurra! panpin polit hauek egiteko material zerrenda ez zen oso luzea izan: 5 kilo arroz (sobera egon zen), koloretako galtzerdiak, botoiak, txintxetak...eta norberak gehitu nahi izan zizkion apaingarriak.
Familia bakoitzak diseinu desberdina egin zuen, eta lanean hasi ziren euren panpina sortuz: galtzerdia moztu, arrozez bete, goma batekin burua eta gorputza bereizi, burua arrozez bete, bufanda  bat egin kolorezko zinta batez, botoi eta txintxetak erabiliz begiak eta ahoa egin...aukera asko zeuden, eta sormena lantzeko parada ederra izan zuten umeek!
Gainera, azpimarratzekoa izan zen haurren artean zelan partekatu zuten materiala: sobera zituzten apaingarriak besteei eskainiz, galtzerdi koloretsuak banatuz, kola berezia partekatuz...Ondo pasatzeaz gain, balore garrantzitsuak lantzen diren seinale.
Azkenerako, erritmoa eta gustua hartu ziotenez, familia bakoitzak pare bat panpina egin zituen, tamaina eta ezaugarri desberdinekin: txanoarekin, ile artifizialarekin, sudur handia/txikia, batzuek besoak jarri zizkioten, beste batzuek alfonbra "miragarriak" egin zizkieten... Hona hemen, aragzkietan, horietariko batzuk:



Beno, bukatzeko, hurrengo saiorako gonbitea luzatu nahi dizuegu, ea familia gehiago animatzen diren eta Gurasolagun dinamika egonkortzea lortzen dugun, oso esperientzia ona izaten ari baita. 3. saioa otsailaren 11n, astelehenean, egingo dugu, Bolintxu euskaltegian, 17:30etatik aurrera. Bertan, lepokoak eta pultserak makarroi eta abarrekin egiten ikasiko dugu. Etorri eta gozatu zure umeaz eta euskaraz!!
Praktikatu eta bizi!

2019-01-29

PINGUINO JOSTAGARRIAK GURASOLAGUN TAILERREAN


Negua bete-betean sartu zaigu azken asteotan, eta etxetik ateratzeko aitzakia onak behar ditu jendeak. Bada, badirudi gustura dabiltzala Galdakaoko Gurasolagun taldea osatzen duten familiak, izan ere, kurtsoa hasi zenetik hiru hitzordu egin dituzte, eta zein baino zein arrakastatsuagoa izan da. Irudietan duzuen azken honetan, pinguino txikiak sortu dituzte, giro ezin hobean.


Tailer honetan, gainera, beste hiru familia gehitu zaizkio eskulanetan dagoeneko erdi adituak diren beste kideei. Izen berriak ikasteko jolas labur bat egin zuten, eta berehala ekin zioten lanari. Materiala, aurrekoetan bezala, erreza bezain merkea: plastikozko botila txikia, kotoia, fieltro beltza,  eta mokoa egiteko eva goma laranja zati txiki bat. Hilabete honetan kapitain lanetan, azalpenak ematen: Veronica, Eneko eta Markel



  Umeek berehala hartu zioten gustua kotoia zatitu eta botiletan sartzeari. Gurasoek, berriz, pinguinoaren "gabardinari" neurria hartzea bezalako lan zailagoetan trebe, hau da, talde-lan zein lantalde paregabea. Azken finean, horixe da Gurasolagunen lortu nahi duguna: ondo pasatzeaz gain, guraso eta seme-alaben arteko euskarazko harremana sendotzea


  Arratsaldeak ez zuen gehiagorako eman, eta elkarrekin egon ginen ordu eta erdia ziztu bizian joan zitzaigun. Hurrengo zitan joan den ostiralean Urreta ikastetxean bezain ondo pasatzea espero dugu. Eta seguru gaude horrela izango dela, orain arte tailerra antolatzeaz arduratu diren familiek primeran egin dute eta. Eskerrik asko Veronica, Eneko eta Markeli.

Egiten duen hotza ikusita, ziur pinguinoak etxean bezala sentitzen direla ;)

2019-01-24

GURASOLAGUN BASAURIN: ELURREZKO PANPINAK

Datorren astelehenean, urtarrilaren 28an, Basauriko Gurasolagunok elurrezko panpinak egingo ditugu. Hitzordua 17:30etan izango da, Bolintxu euskaltegian. Izena emateko azken eguna astelehena bera izango da.
partaideek ekarri beharrekoak:
- Galtzerdi zuri handia
- Koloretako galtzerdi zaharrak
- Botoiak
- Ileko goma txikiak
Beste guztia antolakuntzak jarriko du. Animatuko??
Praktikatu eta bizi!!

KORTXOZKO BARKUEKIN JOLASTEN

Urtarrilaren 14an izan zen Basauriko lehen Gurasolagun saioa, eta argazkian dauden lau familiak izan ziren parte hartzaileak. Aurpegietan ikus daiteke ondo pasa zutela, bai umeek, baita gurasoek ere.
Barku hauek egiteko beharrezko materiala prest zuten iritsi zirenerako: kortxoak, tamaina desberdinetako zotzak, "gomaeva" belak egiteko, kortxoak lotzeko gomatxoak, artaziak eta kola zuria. Ondo pasatzeko gutxi nahikoa dela argi ikusi genuen.
Hasteko, kortxoak gomatxoen bidez lotu zituzten; ondoren, "gomaeva" moztu zuten euren gustuko belak sortuz; jarraian, zotza belan sartu zuten eta amaitzeko, zotza kortxoetako batean sartuz barkua bukatu zuten.
Mekanismo erraza zenez, familia bakoitzak bi barku egin zituen, tamaina, kolore eta apaingarri desberdinez osatua. Bigarren barkua bukatzean, intxaur-barkua egiteari ekin zioten: intxaurra aizto batez zabaldu zuten, poliki-poliki, oskola apurtu ez zedin. Gero, oskolaren barnealdean plastilina zati bat jarri zioten, bertan zotza txertatzeko. Eta bela egiteko, lehen egindako prozedura errepikatu zuten.
Azkenik, barkuak ondo egin genituen baieztatzeko, uretan sartu genituen eta esan beharra dago fin  ibili zirela, denek flotatzen baitzuten!! Lana ondo egin zuten seinale, dudarik gabe.
Saioari amaiera emateko, lastotxo batekin  barkuei putz eta putz aritu ziren umeak, barku bizkorrena zeinek egin zuen erabakitzeko!!
Lehen saioa izateko ederki pasatu genuen, eta hemendik aurrera familia gehiago animatzea espero dugu, guraso eta haurren artean ordubete alaia igarotzeko plan ezin hobea baita, eta gainera, euskaraz!!
Praktikatu eta bizi!!



2019-01-07

BASAURIKO LEHEN GURASOLAGUN SAIOA

Abenduan atzeratu genuen saioak badu data berria: astelehena, urtarrilak 14. Ordua eta lekua, aurrekoan aipatutako berberak izango dira: 17:30etan Bolintxu euskaltegian. Anima zaitez zure seme/alabarekin hizkuntza ohiturak aldatzen hastera!!
Izena emateko azken eguna, ostirala, urtarrilak 11, izango da.
Praktikatu eta bizi!!!