Goizeko 10etan ekin genion bideari Ereño herritik, apurka-apurka, aldapa pikua baitzen! Igotzen joan ahala, Urdaibai inguruko ikuspegiez gozatu genuen, lanbroak uzten zigun heinean...guzti horrek kutsu miragarria eman zion ibilbideari. Gora iritsi ginenean (argazkian ikus daitekeen moduan), lanbroa ia erabat desagertua zen, eta bizkaiako mendi esanguratsuenak begiztatzeko aukera ederra oparitu zigun egunak: Gorbeia, Lekanda, Oiz, Anboto, Sollube...
Mokadutxua jan ostean, jaitsierari ekin genion Ereñorantz, bertan kotxeak hartu eta Santimamiñeko aparkalekura abiatu ginen. Autoa utzi ostean, Omako basorantz joan ginen ibilbide zirkularra eginez. Goitik ailegatu ginen, Ibarrolaren artelan berezia ikusi, eta beheko partetik itzuli ginen aparkalekura, ordu eta erdiko ibilaldia egin eta gero.
Bukatzeko, mendi-buelta guztiek merezi duten moduan, garagardo freskoa hartu genuen Leizika tabernan, goiz polit honi amaiera emateko!! Eta noski, hurrengo mendi irteera antolatu genuen, baita egun eta lekua erabaki ere:
azaroaren 11n, igandean, Tologorrira joango gara. Gurekin etorriko??
Praktikatu eta bizi!!
No comments:
Post a Comment