GABONETAKO APAINGARRIAK PRESTATZEN

Urteari agur esateko tailer dibertigarria antolatu zuten Galdakaoko gurasolagunek joan den ostiralean. Oporretan egon arren, atsedenik ez hartzea erabaki zuten familiek, eta umeek ze ondo pasatu zuten ikusita, bistan da erabaki ona hartu zutela. AEKn elkartu ziren animatu ziren zazpi familiak, eta gabonetako izei polit bana egin zuten, senideak bisitan doazenean, etxean dotore-dotore luzitzeko.

Izeia izan zen protagonista nagusia, baina eskulana hasi aurretik, Olentzeroren irudi bat margotzen ere aritu ziren gure txikiak. Birziklapenaren balioa nabarmentzen saiatzen gara beti, eta hilabete honetan, komuneko paperaren tutua erabili dugu enborra egiteko. Kartulina berde zati txiki bat eta purpurinaz jositako papera izan dira nahikoak arbolari eta zintzilik jarritako bolei forma emateko.

Sorpresa bi izan genituen lehengoan. Alde batetik, Euskara Zerbitzuak meriendarako poltsa bana oparitu zien umeei. Barruan, margo eta karamelu batzuk sartu zizkien, eta umeak poz-pozik joan ziren etxera. Bestetik, Susanak etxetik ekarritako "Elur malutak" eta "Olentzero eta astoa" gabon-kantak abestu genituen.Eskolan landu zuten umeek koreografia, eta ikasitakoa praktikan jarri zuten, helduon gozamenerako.

Txalo bero bat Itxaso eta Norari, ostiraleko tailerra gidatu zuten artistak!!!
Hurrengo hitzordua urtarrilaren 24an izango da. Animatuko zara?

URTARRILEKO AGENDA

BASAURIKO GURASOLAGUNAK PINGUINOAK EGITEN

Kosta zaigu elkartzea, baina azkenean lortu dugu 2019/2020 ikasturteko lehen  Gurasolagun tailerra egitea Basaurin. Guraso eta seme-alaba berriek izena eman dute, eta guztientzako egun aproposa topatzea izan da zailena, baina itxaroteak merezi izan du.
Goiko argazkian ikusten den legez, negua gainean dugunez pinguino barregarriak egitea izan genuen helburu, baita lortu ere! Esan beharra dago ideia Galdakaoko Gurasolagunei hartu diegula, beraz, ezer baino lehen, eskerrak ematea dagokigu!

Tailerrari dagokionez, egiteko erraza eta dibertigarria izan zela aitortu behar dugu; gainera, familia bakoitzaren irudimenari bide eman zion, norberak pinguinoei apaingarri bereziak jarri zizkion eta. Hasteko, familia bakoitzak etxetik 2 ur botila txiki ekarri zituen, pinguinoen gorputzak izango zirenak. Ondoren, umeak hasi ziren gorputz hori kotoiz betetzen: poliki-poliki baina gelditu gabe. Bitartean, gurasoak fieltro eta gomaeva beltza mozten hasi ziren, pinguinoen "jantzia" izango zena, noski, "animaliaren" gorputzaren tamaina kontuan hartuz. "Jantzia" botilara itsasteko silikonazko pistolak erabili genituen, eta egia esan oso ongi funtzionatu zuten: azkar eta egoki itsatsi ziren.
Behin gorputza beteta eta jantzia jarrita, familia bakoitzak osagarri ezberdinak gehitu zizkion norbere gustu eta irudimenaren arabera: mokoa eta oinak egiteko gomaeva laranja, kartulina marroiarekin kapela, artilearekin tapauka, ohial zatiekin gerrikoa...

Lehen aipatu bezala, familia bakoitzak bi botila ekarri zituen, hortaz, lehen pinguinoa amaitzean bigarrena egiteari ekin zioten, oraingo honetan azkarrago, mekanismoa barneratuta baitzeukaten dagoeneko. Aitortu behar dut azken emaitzak uste baino ederragoak izan zirela, material gutxi erabiliz eta sinple-sinple emaitza txundigarriak lortu daitezkeen seinale!!

Poz-pozik amaitu zuten gure familiek, eta Gabonak pasa ostean berriro elkartuko garela promestu genion elkarri. Zein izango ote da hurrengo eskulan edo tailerra? Gurekin parte hartu nahi duzu? Bada adi ibili eta segi ezazu gure bloga, bertan iragarriko baitugu! Ordurarte, ongi pasa Gabonetako oporrak eta asko jolastu euskaraz!

PRAKTIKATU ETA BIZI!

BASKOT GAUA

Urtero bezala, Gabonak iristen direnean Hego Uribeko berbalagunek eta Aek-ko ikasleek gauza bi baino ez dituzte buruan: bata, Baskot Gaua, eta bestea, argi dago: KAPELA!! kar, kar, kar

Helburua jai parte hartzailea egitea izaten da, eta horretarako partaideek taldeka kapela bat egin behar dute festara eramateko. Aurtengo gaia "URTAROAK" izan da, eta horren inguruko kapela desberdin ugari ikusi genituen pasa den ostiralean: udazkena irudikatzen, lau urtaroak...buruari eragin zioten behintzat!!

Hasteko, Basauriko kaleetatik poteoa  egin genuen, motorrak berotu eta giroa animatzeko ( bide batez, basauriarrek ikus gintzaten). Pote bi hartu ostean, San Jose ikastetxera abiatu ginen, festaren mamia bertan baikeneukan prest.

San Jose ikastetxe barruan jatekoa eta edatekoa zuten prest Berbalagun eta ikasleek. 45 minutuz jaten, edaten, hitz egiten...egon ostean,benetako jaiari hasiera eman genion: Taupaka sortzaileen elkartearen partez etorritako Txikik egindako bakarrizketa eta ikasle eta berbalagunek prestatutako koreografia mundialak!!

(bakarrizketa hasi aurretik)

Argazki honetan ikus daiteke Txiki, bakarrizketa egin zuen artista, zentzu on guztietan, jaialdia bideratzen, gu guztiok barre algaraka aritu ginen bitartean. Oso originala eta dibertigarria izan zen, eta hasiera mailan dauden ikasleentzako oso aproposa, hizkera behe urratsetara moldatzeaz gain, gure belaunaldiko kontuen inguruan aritu baitzen, denok identifikatuta sentituz!
Ordubete pasatxo barrez lehertzen aritu eta gero, koreografien ordua iritsi zen. Taldeka atera ziren gure partaide animosoak, eta ordura arte nahikoa barre egin bagenuen ere, hortik aurrerakoa izugarria izan zen! Basaurin euskara eta umorea badabiltza!! Eta lotsa gutxi...kar,kar,kar
Bukatzeko, kapela onena eta koreografia onena saritu ondoren, koreografia irabazlea denon artean dantzatu genuen festari amaiera emateko. Hurrengo urtean itzuliko gara euskaraz gozatzeko asmoz!!

PRAKTIKATU ETA BIZI!

GALDAKAOKO 6.MINTZODROMOA ETA EUSKARAREN EGUNA

Egun markatua dugu abenduaren 3a. Atzo, beste behin ere, lepo egon zen Torrezabaleko areto nagusia, goizean antolatu genuen mintzodromoari esker. AEK, Udal Euskaltegi, Eguzkibegi eta institutuetako ikasleak ez ezik, berbalagunak eta euskaltzale ugari ere elkartu ziren kultur etxean,guztira 125. Bertan, Black Friday, Durangoko Azoka eta gaur egun kirolak duen garrantzitsua izan genuen hizpide, eta atseden gabe eragin genion mingainari

Euskara da ekitaldiaren protagonista nagusia, baina mintzodromoa oso anitza da; izan ere, bertan, adin, sexu, jatorri eta errespetuan eraikitako iritzi guztiek dute lekua. Ezin aipatu gabe utzi aniztasun horren isla diren herriko elkarte laguntzaileak: Zizpa, Bagabiz, Patakon, Bertso-eskola, Orreaga eta Erabide. Eta elkarteez gain, Manu Etxebarria, Miren Elorriaga eta Berbalaguneko bidelaguneko Pili Gonzalez bidelaguna

Arratsaldean, Udalak eta herriko zenbait taldek antolatutako mosaiko argitsuan hartu genuen parte, euskara (ber)pizteko asmoz. Kalean hotz handia zegoenez, dantza apur bat ere egin behar izan genuen, kandela bana lurrean kokatu eta denon artean "Piztu euskara" leloa eratu genuen arte. Azkenik, argazki ederra atera ziguten bertaratu ginen berbalagun, euskara ikasle eta bestelako euskaltzaleoi.

Kandelak lurrean utzi eta euskaltegira bueltatu ziren AEK-ko B2 eta C1eko ikasleak, arratsalderako prestatuta zegoen mintzodromo txikiari ekiteko. Ikasleak 3 gelatan banatu genituen, eta goizeko saiokoek bezala, txokolate beroa eta pastez gozatu zuten, kalean pasatutako hotzari aurre egiteko. Gure Esku Dago-ko Nekane Larrea etorri zitzaigun dinamizazioan laguntzera, eta berak ere ederto pasatu zuen.

Eguna borobiltzeko, Usansoloko lehen mintzodromoa antolatu zuten Usansolon Euskaraz taldeak eta    AEK-k, elkarlanean. Txapelenan ere ez zen pasta eta txokolaterik falta, eta argazkian guztiak agertu ez arren, 18 lagun batu ziren bertan.





Zorionak eta eskerrik asko atzoko ekitaldi guztiak aurrera ateratzen lagundu zenuten erakunde, talde eta norbanako guztioi!

BASKOT GAUA

 Urtero bezala, Gabonak iristen direnean Hego Uribeko berbalagunen eta euskara ikasleen jai ospetsua ospatzen dugu: Baskot Gaua.
Dakizuen moduan, urteari bukaera alaia emateko antolatzen dugun festa da, euskara ikasleek eta berbalagunek parte har dezaten. Bi baldintza soilik bete behar dira: kapela buruan duzuela etortzea eta euskal abesti baten koreografia prestatzea; biak taldeka.
Aurten kapelaren gaia "URTAROAK" da, eta horren inguruko kapela sortu beharko du talde bakoitzak; gainera, prestatutako koreografia eszenatoki gainean aurkeztuko dugu, partaideen gozamenerako!!
Hortaz, anima zaitez giro ederra egongo baita: 20etan geratuko gara Bananas tabernan poteoarekin hasteko. 20:30ean San Jose ikastetxera joango gara, eta bertan edari eta pintxoak izango ditugu zain. Pilak kargatu ostean, ustekabeko ikuskizun dibertigarria izango dugu animatzaile, eta bukatzeko, ikasle, berbalagun eta irakasleen koreografiak!!
 Galduko duzu?? Ez, ezta? Hortaz, hasi kapela eta koreografia prestatzen eta arrasti hori libre eskatu etxean, ederki pasatuko dugu eta!!
EGUNA: ABENDUAREN 13a
ORDUA: 20:00etatik aurrera
LEKUA: Poteoa Bananas tabernan,eta jaia San Jose ikastetxean( azken momentuko aldaketarik balego, abisatuko genuke)
Praktikatu eta bizi!!!

GALDAKAOKO GURASOLAGUNEN LEHEN TAILERRA: HUESITO GOXOAK!!!

Kuadrilla ederra elkartu zen atzo Galdakaoko Gurasolagunen ikasturteko lehen tailerrean. Guztira 9 familia,28 lagun, sartu ziren Asier dinamizatzailearen Berezioetxeko txokoan. Ume eta ez hain ume direnei horrenbeste gustatzen zaizkien huesitoak egin genituen, Tere eta Josuren argibideei jarraituz. Emaitza? dendan erositakoak goxo badaude, imaginatu etxean egindakoak...itzelak!

Umeak primeran moldatu ziren txokolatea barkilloetan zabaltzen, eta gurasoen laguntzari esker moztu eta bata bestearen gainean jarri zituzten. Lehenago esan bezala, Tere arduratu zen atzoko tailerra gidatzeaz, baina guraso guztiak egoten dira beti laguntzeko prest, eta horra elkarlanaren adibide bat: batzuk harrikoa egiten, beste batzuk txokolatea urtzen, mahaiak garbitzen...Eta gainontzekoak?

Besteak, txokolatea urtu bitartean, umeekin jolasten. Izan ere, ez da erraza 16 ume 30 metro karratuko lokal batean gobernatzea. Beraz, zoritxarrez, gaur egun gero eta gutxiago ikusten den egoera bat bizi izan genuen atzokoan: umeak kalean,  soka saltoan jolasten. Zeinen gustura aritu ziren! Ideia bikaina, Sergio!

Eguna borobiltzeko, Euskaraldiaren harira Bagabiz Euskara Elkarteak antolatutako bertso-bingora joan ziren familia batzuk, eta han ere ederto pasatu zuten. Bitxia da, iaz ere Euskaraldiaren ekitaldian elkartu ginen lehenengoz. Ea iazkoa bezain emankorra den 2019-20 ikasturtea! Atzokoa ikusita, behintzat, seguru!!!

j

Eskerrik asko, Tere eta Josu, atzo lan ederra egin zenuten eta!

ABENDUKO AGENDA

BASAURIKO GURASOLAGUNAK PINGUINOEKIN JOLASEAN

Ikasturte honetako lehen Gurasolagun saioa bertan da!! Parte hartu nahi?? Gurekin kontaktuan jarri edo bestela, egun eta ordu zehatze horretan Bolintxu euskaltegira etorri.
Oraingo honetan, negua hurbil dugunez, "pinguino jostagarriak" egingo ditugu. Horretarako, etxetik 2 plastikozko botila eta kotoi pixka bat ekarri behar dute partaideek. Gainerako materiala guk jarriko dugu.
Hortaz, ez egin zalantzarik eta etorri gurekin gozatzera!!

PRAKTIKATU ETA BIZI!!

HEGO URIBEKO MENDILAGUNAK BAKIO INGURUAN

Ikasturte honetako lehen irteera izan zen aurreko igandean egin genuena, eta eguraldi kaxkarra zela eta, zortzi ausart besterik ez ginen animatu Bakio eta Matxitxako lurmuturraren arteko ibilbidea egitera. Hala ere, igande goiz aparta pasatu genuen!

Goizeko 8:30ean genuen hitzordua Basauriko udaletxe aurreko markesinan. Handik bi kotxetan joan ginen Bakiora, eta bertan kafetxoa hartu eta gero ibilbideari ekin genion. Ikus dezakezuen lehen argazkia Bakiotik Eneperi jatetxera dagoen begiratoki  batean ateratakoa da.

Argazki honetan ikusten denez, euria izan genuen tarteka, baina Berbalagunek adoretsu jarraitu zuten aurrera; euritakoa lagun, zira lagun...irribarrea ahoan. Euskal Herriak halako egunak gehiago ditu eguzkitsuak baino, eta xarma berezia eman zion txangoari. Gainera, badakizue: gogoko tokian aldaparik ez!

Tipi-tapa tipi-tapa Gaztelugatxe ondotik pasatu ginen, eta 2 orduren buruan Matxitxakoko itsasargian geunden. Bertan banana, sagarra eta mandarinak jan, eta itzulerako bideari ekin genion, eguerdian etxean bazkaltzeko egon nahi genuen eta.

( Gaztelugatxe urrunean)

Bukatzeko, Bakion bertan zurito eta pintxoa hartu ondoren, eguerdiko 15etarako Basaurin ginen berriro, hurrengo irteera egiteko ideiak buruan genituela. Goiz polita igaro genuen eta dagoeneko errepikatzeko gogoz gaude. Eta zu? Animatuko zara hurrengoan? Adi egon gure blog eta facebook-ean ezagutaraziko baitugu datorren irteeraren data eta lekua!!

PRAKTIKATU ETA BIZI!! 

DATORREN OSTIRALEAN, HILAK 29, GURASOLAGUN TAILERRA: HUESITOAK

GALDAKAOKO JOSTUNAK PULTSERA ETA LEPOKO DOTOREAK EGITEN

Talde beteranoa dugu jostunena. Txaroren gidaritzapean daramatzate fin-fin 10 urte inguru, eta gauza ikaragarri politak egin dituzte urte hauetan guztietan. Aurten, gainera, lagun gehiago gehitu zaizkio taldeari eta inoiz baino biziago dago jostundegia. Horren adibide dira Sorkunde kide berriaren azalpenei esker egiten ikasi duten pultsera eta lepoko sorta. 





Hari berezi bat eta hainbat apaingarriz hornitzen dituzte eskumuturretako eta lepokoak. Kolore, lodiera eta marrazki ezberdinak dituzte denek; zein baino zein politagoa! Eskulan hauek gustuko dituenak prezio ezin hobean erosteko aukera ere badauka; beraz, taldean parte hartzeko astirik ez daukanak erostea dauka!

  

















Horrelako eskulan politak egiten ikasi nahi badituzu,zatoz asteazkenetan, 18:00etan, AEKn batzen diren berbalagun jator hauekin.

AURKEZPEN JAIA BASAURIN

Ederki pasatu genuen ( betiko lez), aurreko ostiralean Bonboi tabernan ospatu genuen aurkezpen jaian. 40 lagun inguru elkartu ginen eta hasteko, familia argazkia egin genuen, goiko argazkian ikus daitekeen bezala.

Ondoren, jolasei ekin genien: lehenbizi, taldeak sortzeko jolas sinplea egin genuen: irudi ezberdinak banatu genizkien bekokian jartzeko, eta partaideek, logika bilatuz, euren taldea batu behar zuten. Horren ostean, tartetxoa eman genien elkar ezagutu eta hitz egiteko.

Pintxoak jateko atsedenaldia eta gero, asmakizunen jolasekin segitu genuen. Lehengo taldeak mantenduz, bakoitzak bere zutabean, orrietan jarrita, Basauriko lekuak zituzten, baina hizkiak desordenatuta. Taldeka, hizkiak ordenatu eta Basauriko zein toki zen asmatu behar izan zuten.

Jolasa amaitu ostean, beste geldialdi bat pintxoak jan (sekulakoak!!) eta elkar ezagutzeko edota zigarro bat erretzeko. Pintxo aukera zabala izan zuten gure Berbalagunek!

Ondoren, "1x2" jolasa egin genuen: 3 multzo zituzten, esaterako "Athletic/Erreala/Osasuna", eta guk datu batzuk eman eta gero, haiek zegokien multzoarekin lotu behar zuten.
Eta bukatzeko, musika denetarako lagungarri denez, abestien jolasa: taldeka beti ere, abesti baten letrako hutsuneak bete behar zituzten, guk emandako aukerekin. Ondoren, abestia entzun/dantzatu/abestu bitartean jarritako hitzak begiratu genituen, asmatu zuten ala ez ikusteko. Jaiari bukaera erritmotsu eta alaia eman genion horrela!!
Bukatzeko, irabazleak egon ziren, txapelketa guztietan bezala, eta Berbalagunen partez opari batzuk jaso zituzten! Begira zein dotore agertzen diren gure txapeldunak!! Kar, kar, kar!

Amaitu baino lehen, eskerrak eman nahi dizkiot Liberi, Bonboi tabernako jabeari, pintxo biziki gozoak prestatu baitzituen, eta sekulako pazientzia eduki baitzuen gurekin!! Hurrengoan, noski, errepikatuko dugu!

PRAKTIKATU ETA BIZI!!

GALDAKAOKO VI.MINTZODROMOA

MARTXAN DA GALDAKAOKO PASEO TALDEA

11 urte dira Galdakaon paseatzeko berbatalderik ez zegoela.Atzo, eguraldi kaskarrari aurre eginez, bost berbalagunek jarri zuten martxan aspaldiko talde berezi hori. Gainera, Praktikatu zerbitzutik bidalitako material berria estreinatu zuten: euritako eta motxila dotore bana!

Hemendik aurrerako hitzorduak jarrita daude: asteartero, 17:00etan, anbulatorio parean. Ordubeteko ibilbidetxo lasaia izango da

Zeu ere animatzen bazara, deitu 607 146 855 zenbakira edo bidali mezu bat galdakao_berba@aek.eus helbidera

Zure zain gaude ;)

GALDAKAOKO AURKEZPEN JAIA

Arratsalde ederra Galdakaoko berbalagunek AEK-ko ikasle eta irakasleekin batera lehengoan bizi zutena. Urtero bezala, Someran elkartzen diren talde bien hitzorduak aprobetxatuz, ostegunez ospatu dugu festa polit hau, berbalagunak eta ikasleak elkar ezagutu dezaten. Bada, bistan da helburua lortu dugula, osteguneko partaideak ez ezik ia talde guztietako kideak ere agertu baitziren.

Zer demontre egin zuten Topa tabernan Beatles eta Abba taldeek, Ninja dortokek, 4 fantastikoek, "Urrezko emakumeek", Harriketarrek, Scooby Doo-ren lagunek, Trotamusikoek, Sheldon Cooper-en kuadrillak eta A-taldeak? Modu bitxia lauko taldeak egin eta ezagutzen ez dituzun beste hiru pertsonarekin euskaraz aritzeko, ezta?

Horrelako jaietan, ordea, hitz egitea baino gehiago eskatzen diogu jendeari. Jolasean eman genuen arratsaldea, azken finean, euskaraz ere primeran pasa daitekeela erakutsi nahi izaten dugu urtero. Eta honetan ere bete-betean asmatu genuela esango nuke, "Ahora caigo" telebista saioko hiru proba dibertigarrirekin ederto batean pasatu genuen eta.

Eguna ondo hasi eta hobeto amaitu zen. Izan ere, bihar hasiko den paseo taldeak partaideak behar zituen, eta hiru pertsona gehiago animatu ziren festa amaitu zenean. Eta zu, zeren zain zaude gero eta handiagoa den proiektu honetan parte hartu eta gurekin osteguneko festan bezain ondo pasatzeko?

GAUR, 19:00ETAN, BERBALAGUN AURKEZPEN JAIA GALDAKAON

AZAROAK 15, BASAURIKO AURKEZPEN JAIA BONBOI TABERNAN

Datorren ostiralean, azaroaren 15ean, Basauriko Berbalagunen "Aurkezpen Jaia" ospatuko dugu. Urtero bezala, ikasturteari hasiera emateko, Berbalagun ezberdinek elkar ezagutzeko eta ondo pasatzeko baliatuko dugu jai hau. Eta urtero bezala, noski, pikoteoa, edaria, jolasak eta sorpresak izango ditugu! Beti ere musikaz lagunduta!
Beraz, ez egin zalantzarik eta hurbildu zaitez Berbalagun dinamika bertatik bertara ikustera! Ederki pasatuko dugu eta euskaraz gozatzea oso posiblea dela ikusiko dugu!! Anima zaitez!!

PRAKTIKATU ETA BIZI!!

GURASOLAGUN AURKEZPENA. ASTELEHENEAN, 17:00ETAN, GANDASEGIN

AZAROKO AGENDA

GALDAKAOKO BERBATALDE BEREZIAK

BASAURIKO BERBALAGUN TALDE BEREZIAK

Aupa, Berbalagun zein euskaltzale!!
Kartel honen bidez Basaurin dauden Berbalagun talde berezien informazioa plazaratu nahi dugu. Momentuz 3 talde martxan ditugu aurreko urteetatik: txalaparta taldea, asteazkenetan 20etan elkartzen da Gaztetxean; dantza talde 2 ditugu; maila baxua dutenak eta arituak. Lehena ostiraletan 18etan elkartzen da Pozokoetxeko kultur etxean; bigarrena, egun eta leku berean 19etan. Eta martxan dagoen hirugarren taldea mendi taldea da; hilean behin mendi irteera bat egiten saiatzen gara, larunbat edo igandeetan.

Martxan daudenez gain, aurten irakurketa taldea sortu nahi dugu, taldean ipuin errazak irakurri eta horien gaineko hausnarketa, iritziak...emateko helburua izango duena.

Hortaz, halako talde batean parte hartu nahi baduzu, edo informazio osagarria jaso nahi baduzu, jarri kontaktuan gurekin telefono, Facebook edo e-posta bidez, eta gustura asko azalduko dizugu funtzionamendua!! Eta nola ez, proposamen eta ideia berriak egiteko aukera duzue, guretzat lagungarri izango dira gainera.

Animatu zure gustuko ekintzak euskaraz egitera eta hurbildu Berbalagun proiektura, ez zara damutuko eta!! Euskaraz eta euskararekin gozatzea posible baita!!

Praktikatu eta bizi!!