GALDAKAOKO GURASOLAGUNEN LEHEN TAILERRA: ELUR PANPINAK

Azaroaren 30ean eman genion hasiera ikasturteari, Euskaraldiak antolatutako umeentzako tailer baten aitzakian. Gaurkoa, berriz, gurasolagunek antolatu du, gabonetako oporraldi luzean euskaraz momentu dibertigarri bat igarotzeko asmoz. Arrozez egindako elur panpinak egin dituzte bertaratu diren sei familiek. Orotara 18 lagun bildu dira, eta primeran pasatu dute guztiek.

Galtzerdi zuri zahar bat, beste bat koloreduna,  500g. arroz, artile pixka bat eta botoi pare bat. Horixe izan da erabilitako materiala. Osagai guztiak mahai gainean jarri, eta lanean hasi dira gogotsu umeak zein gurasoak. Eskulanak ez zuen aparteko zailtasunik, baina zenbait pausutan elkarri lagundu behar izan diote partaideek. Beraz, helburu nagusiak, hau da, elkarlana euskaraz uneoro nabaritu dira AEKren gela nagusian



Umeek asko gozatu dute, eskulanak esperotako forma hartu ahala. Gainera, kasu honetan, etxeko arropa zaharrekin ere gauza politak egin daitezkeela ikusi dute; eta horrek birziklatzearen balio erakutsi die. Panpinari bufanda egin eta gero, atalik zailena etorri da: ponpoidun txanoa. Baina proba hau ere aise gainditu dute txikiek, gurasoen laguntzari esker. Azken emaitza begi bistakoa da: elur panpi dotore-dotore bana

Gaurko tailerra familia batek antolatzen duen lehena izan da. Ikasturtearen kronograma egin genuen, eta abenduko hitzorduaren ardura Monicak hartu zuen, Eider eta Enara alaben laguntzarekin. Primeran eman dizkigute argibideak, bai whats app bidezkoak bai euskaltegian bertan sortu diren zalantzak argitzeari dagozkionak. Tailerra amaitzean aitortu digute oso erraza izan dela gaia aukeratu eta jorratzea. Hortaz, seguru gaude urtarrilaren 25ean egingo dugun ekintzari animoz beteta helduko diola hurrengo familiak. Gaurkoz besterik ez.

Eskerrik asko, hirukote!

ABENDU AMAIERAKO ETA URTARRILEKO AGENDA

HEGO URIBEKO BASKOT GAUA

Urtero bezala, Gabonak iristen direnean Hego Uribeko berbalagunek eta Aek-ko ikasleek gauza bi baino ez dituzte buruan: bata, Baskot Gaua, eta bestea, argi dago: KAPELA!! kar, kar, kar

Helburua jai parte hartzailea egitea izaten da, eta horretarako partaideek taldeka kapela bat egin behar dute festara eramateko. Aurtengo gaia "GABONAK" izan da, eta horren inguruko kapela desberdin ugari ikusi genituen pasa den ostiralean: opari itxurakoak, xanpain botilak,Mari Domingi josi zuten batzuek...buruari eragin zioten behintzat!!

Hasteko, goiko argazkian ikusten den bezala, Basauriko kaleetatik poteoa  egin genuen, motorrak berotu eta giroa animatzeko ( bide batez, basauriarrek ikus gintzaten). Pote bi hartu ostean, San Jose ikastetxera abiatu ginen, festaren mamia bertan baikeneukan prest.

San Jose ikastetxe barruan jatekoa eta edatekoa zuten prest Berbalagun eta ikasleek, eta argazkian ikusten den bezala koadrila ederra elkartu ginen. 30 minutuz jaten, edaten, hitz egiten...egon ostean,benetako jaiari hasiera eman genion: Taupaka sortzaileen elkarteak antolatutako "Bingo Txou"-a eta ikasle eta berbalagunek prestatutako koreografia mundialak!!

Argazki honetan ikus daiteke Eukene, Bingo Txou-a gidatu zuen artista, zentzu on guztietan, jaialdia bideratzen, gu guztiok barre algaraka aritu ginen bitartean. Oso originala eta dibertigarria izan zen, eta hasiera mailan dauden ikasleentzako oso aproposa, zenbakiak birpasatzeko baliatu baitzuten!
Ordubete pasatxo jolasean aritu eta gero, koreografien ordua iritsi zen. Taldeka atera ziren gure partaide animosoak, eta ordura arte nahikoa barre egin bagenuen ere, hortik aurrerakoa izugarria izan zen! Basaurin euskara eta umorea badabiltza!! Eta lotsa gutxi...kar,kar,kar
Bukatzeko, kapela onena eta koreografia onena saritu ondoren, Basaurin lan ikaragarria egiten ari diren 2 berbalagun omendu nahi izan genituen, haiek baitira martxan ditugun 2 euskal dantza taldeetako irakasle bolondresak: Eskerrik asko bihotz-bihotzez egiten ari zareten lan eskergagatik, Bego eta Ainhoa!!

(Hortxe, Bego Larrea)

                                            ( Eta hortxe, Ainhoa Uriarte)
Honekin, amaiera eman genion jai eder honi. Eskerrak eman nahi dizkiegu hurbildu ziren  partaide guztiei, Eukene artistari eta nola ez San Jose ikastetxeko zuzendari Jabiri, hain leku aproposa beste urte batez laga digulako. Zuoi guztioi esker lortu dugu horrelako jai potentea aurrera eramatea!! Hurrengo urtean itzuliko gara indar handiagoz!!
Praktikatu eta bizi!!!

BASAURIKO GURASOLAGUN SAIOA ATZERATUTA

Sentzitzen dugu hain berandu abisatzea, baina gaur Basaurin ospatuko genuen Gurasolagun saioa atzeratu behar izan dugu, azken momentuko ustekabe bat dela eta. Ahal bezain pronto jakinaraziko dizuegu noiz izango den saioa.
Barkatu eragozpenak. Basauriko berbalagun dinamizatzailea.

GURASOLAGUN ZERTAN DATZAN AZALDUKO DUGU ASTELEHENEAN, GANDASEGIN

GALDAKAOKO 5.MINTZODROMOA IRUDIETAN

Begi bistakoa da mintzodromoaren arrakasta, argazkiari  begiratzea baino ez dago, horretaz jabetzeko. Orain dela bost urte hasi ginen Urreta kiroldegian, gogotsu bezain urduri, eta beste urte batez bete dugu Torrezabal Kultur Etxeko areto nagusia, euskaltegietatik, institutuetatik, Berbalagunetik, Euskara Sailetik eta herriko elkarteetatik etorritako jendeari esker.

Gainera, gaurkoa egun berezia izan da, Euskaraldiaren azken egunarekin bat egin duelako Mintzodromoak. Goiz osoan izan du protagonismoa euskara hauspotzeko dinamika berri honek. Izan ere, pantaila erraldoian ez ezik, hirugarren gaian ere izan dute presente mahaietan egon diren 120 solaskideek. Geuk ere Euskaraldiaren aldeko aletxoa ipini nahi izan dugu, eta kontzientziaren bat astintzeko balio izan badu, ongi etorria saiakera.

Beste gai biak ere interesgarriak izan direla esan digute parte hartzaileek. Lehen gaian, Reality show-ei buruz hitz egin dute. Bigarrenean, berriz, plastikoaren kontsumoaz. Oso gai ezberdinak dira, bertaratutako jendea ere oso ezberdina delako. Sexu, adin, ohitura eta pentsaera aniztasun nabaria ikusten dugu urtero; eta hori dela eta, gaiekin guztiak eroso egotea nahi dugu.





Gaiak, giroa eta txokolate beroa zein pastak primeran egon dira, eta ziur gaude datorren urtean ere halaxe egongo dela dena . Bai horixe! Aurtengoa amaitu aurretik, eskerrik beroena laguntzaile aritu diren AEK, Udal Euskaltegi, Euskara saila, Berbalagun, institutuetako irakasle, Erabide, Zizpa eta Patakoneko kideei; mahaiak eta aulkiak jarri dituzten brigadako langileei eta baita argia kontrolatzeaz arduratzen den teknikariari. Denoi esker atera da dena hain ondo!

Datorren urtean ikusiko dugu elkar. Bien bitartean, segi euskaraz gozatzen!

GURASOLAGUN MARTXAN BASAURIN

Aurten lortu dugu azkenean Gurasolagun berriz ere martxan jartzea Basaurin!! Pare bat urtez saiatu eta ez lortu arren, egoskor lan eginez kapaz izan gara Basauriko gurasoentzako ekimen interesgarri eta baliagarri hau martxan jartzeko.
Helburu nagusia guraso eta seme-alaben arteko hizkuntza ohiturak aldatzea eta euskalduntzea da, elkarrekin egingo ditugun tailer ezberdinen bidez. Hona hemen lehen tailerra: Kortxozko barkuak gauzatuko ditugu gure seme-alabekin batera.
Beraz, anima zaitez zeure seme-alabekin parte hartzera, euskara praktikatzeaz gain, familia-harremanak estutzeko ekimen ezin aproposagoa baita!!
Animatuz gero, jarri kontaktuan gurekin material nahikoa eramateko. Izena emateko azken eguna abenduaren 14a izango da.

EGUNA: abenduaren 17a, astelehena
LEKUA: Bolintxu euskaltegia
ORDUA: 17:00etan
Praktikatu eta bizi!!

BASKOT GAUA

Urtero bezala, Gabonak iristen direnean Hego Uribeko berbalagunen eta euskara ikasleen jai ospetsua ospatzen dugu: Baskot Gaua.
Dakizuen moduan, urteari bukaera alaia emateko antolatzen dugun festa da, euskara ikasleek eta berbalagunek parte har dezaten. Bi baldintza soilik bete behar dira: kapela buruan duzuela etortzea eta euskal abesti baten koreografia prestatzea; biak taldeka.
Aurten kapelaren gaia "GABONAK" da, eta horren inguruko kapela sortu beharko du talde bakoitzak; gainera, prestatutako koreografia eszenatoki gainean aurkeztuko dugu, partaideen gozamenerako!!
Hortaz, anima zaitez giro ederra egongo baita: 20etan geratuko gara Bananas tabernan poteoarekin hasteko. 21etan, San Jose ikastetxera joango gara, eta bertan edari eta pintxoak izango ditugu zain. Pilak kargatu ostean, " Bingo Txou" dibertigarria izango dugu animatzaile, eta bukatzeko, ikasle, berbalagun eta irakasleen koreografiak!!
 Galduko duzu?? Ez, ezta? Hortaz, hasi kapela eta koreografia prestatzen eta arrasti hori libre eskatu etxean, ederki pasatuko dugu eta!!
EGUNA: ABENDUAREN 14a
ORDUA: 20:00etatik aurrera
LEKUA: Poteoa Bananas tabernan,eta jaia San Jose ikastetxean( azken momentuko aldaketarik balego, abisatuko genuke)
Praktikatu eta bizi!!!

ABENDUKO AGENDA

GURASOLAGUNAK ERE EUSKARALDIAREN ALDE

 

Atzo, Euskaraldiaren ekimenarekin batera, hasiera eman genion Gurasolagun ikasturteari. Iazko familiei beste bat batu zitzaion, eta abenduaren 10eko aurkezpenaren ostean, gehiago izatea espero dugu.

Aurpegiak margotzen eta txapak egiten ibili ziren gure txikiak. Abenduko tailerrean beste zereginen bat emango diegu eta ziur atzo bezain ondo pasatuko dutela

GALDAKAOKO AURKEZPEN JAIA

Urtero bezala, egundoko jaiaz gozatu dute Berbalagunek eta euskaltegietatik etorritako ikasleek gaurkoan.
Hitzordua 19:00etan jarrita zegoen arren, tantaka etorri zaizkigu, baina orotara 50 lagun inguruk hartu dute parte. Bejondeigula!
Partaide gehienak berbatalde edo euskaltegiko kideekin sartu dira, eta lehen ordu laurdena aprobetxatu dute lagunekin hitz egin eta menuko ze ekintzatan parte hartuko luketen adierazteko

Jolasekin hasi baino lehen, Ganguren tabernako langileek prestatutako pintxo gozoak dastatu ditugu, hastear ziren probetan barruko onena emateko. Tortilla, urdaiazpikoa, gazta eta kroketa goxo-goxoek eman digute beharrezko indarra, lotsa alde batera utzi eta umeen antzera jolasteko. Eta pintxoek zerbait izango zuten, izan ere, lehian gazteak zein edadekoak hustu egin direla aitortu behar dugu.

Berehala nahastu ditugu ezagutzen ez zuten jendearekin, horixe baita jai honen helburuetako bat, hau da, euskaraz praktikatzeko lagun berriak egitea. Eta lagunak diren 20 marrazki bizidunekin bikoteak egin behar izan dituzte hasieran. Ondoren, bikote bakoitzak falta zuen esaera zahar baten erdia osatu du, eta lauko taldeak eratu ditugu. Eta askotan pailazoarena egiten dugunez, kapitanak identifikatzeko, pailazo sudurra!

 Telebistan ezaguna den "Ahora caigo" saioaren euskarazko bertsioa erabili dugu, berbalagunek 15 panel asmatzeko. Eta jolastu direla aipatu arren, tentsio handia izan dute epai-mahaikoek, galerak erantzuteko, momentuz, pultsadore automatikorik ez dugulako. Hori da lehiakortasuna hori! Eskerrak saririk ez zegoela tartean...kar, kar, kar! Mikrofonoa eskuan duen Mikelek asmatu ditu erantzun gehien, baina denok egin dugu barre gogotik.

Eta zer izango litzateke gure jai bat musikarik gabe? Imajinatzen duzue? Neuk ere ez. Euskal abesti mitikoez osatutako zerrenda asmatu behar izan dute, baina zailtasun batekin: abestiak 5 segunduz jarri eta kendu egiten genuen. Ariketa honetan, Asun ibili da trebeen, baina partaide gutxi izan dira mikrofonoa hartu eta azkenean abestu ez dutenak. Eta seinale bat balitz  bezala, "Agur Xiberua" kantarekin eman diogu amaiera egunari; ikasturteak, ordea, zita asko ditu.

Beraz, hurrengoa ondo apuntatu: abenduaren 3an, 10:00etan, urtero bezala mintzodromoaren 5.edizioa antolatuko dugu Torrezabal Kultur Etxean. Oraindik garaiz zaudete izena emateko. Zeren zain zaudete?

Animatu

GALDAKAOKO V.MINTZODROMOA

BASAURIKO BERBALAGUN AURKEZPEN JAIA

Ederki pasatu genuen ( betiko lez), aurreko ostiralean Bonboi tabernan ospatu genuen aurkezpen jaian. 50 lagun inguru elkartu ginen eta hasteko, Euskaraldiarekin bat egin genuen, goiko argazkian ikus daitekeen bezala.

Ondoren, jolasei ekin genien: lehenbizi, taldeak sortzeko jolas sinplea egin genuen. herrialde desberdinetako irudi esanguratsuak banatu genizkien, eta partaideek, logika bilatuz, euren taldea batu behar zuten. Horren ostean, tartetxoa eman genien elkar ezagutu eta hitz egiteko.

Pintxoak jateko atsedenaldia eta gero, asmakizunen jolasekin segitu genuen. Lehengo taldeak mantenduz, geuk asmakizuna irakurri, eta talde bakoitzak erantzuna mimikaz egin behar zuen; asmatuko zenuten bezala, izugarrizko barreak egin genituen Berbalagunen "okurrentziekin"!!

Eta bukatzeko, 3 Korrika kanta hutsunedun bete behar izan zituzten taldeka, eta gero abestia entzutean, hutsuneetan hitz egokiak nork jarri zituen ikusi genuen. Motibatuta zeudenez, karaoke labur batekin jarraitu genuen, pintxo eta zuritoek emandako indarra baliatuz. Azkenean, puntu gehien lortu zuen taldeak oparitxo batzuk jaso zituen, baita txalo zaparrada ere!

Eskerrak eman nahi dizkiogu hurbildu zen jendeari, eta bereziki Bonboi tabernako Liberi, "Txanpion Ligue"-ko pintxoak egiteaz gain, ederki tratatu baikintuen, sekulako giro polita sortuz!!

OSTEGUN HONETAN, HILAK 22, BERBALAGUN JAIA GALDAKAON

Ganguren tabernan, 19:00etan. Anima zaitez!

BASAURIKO BERBALAGUNAK ERE EUSKARALDIAREKIN BAT!!

https://www.facebook.com/hego.uribekoberbalagunak

Lotura honetan duzue Basauriko Berbalagun bik egindako bideoa! Motibagarria izatea espero dugu! Ez galdu denborarik eta emazu izena!
Zer izango zara, ahobizi edo belarriprest?
Praktikatu eta bizi ezazu Euskaraldia!!

GALDAKAOKO BERBALAGUNAK ERE EUSKARALDIAREN ALDE

Euskaraldiaren aldeko hamaikakoa osatzeko 11 pertsona behar genituela esan eta horra erantzuna: bi hamaikako ere egin genezakeen, kar, kar, kar


Kopurua baino garrantzitsuagoa da, ordea, egitasmoan dugun aniztasuna; eta argazkiari erreparatzen badiogu, argi dago mota guztietako jendeak daukala lekua gurean: emakumezkoek zein gizonezkoek; gazteek zein adinean gorakoek; ama hizkuntza euskara dutenek zein etxetik kanpo ikasi dutenek; bertan jaio direnek zein kanpotik etorritakoek...euskaraz bizi ahal izatea da denon nahia, eta xede horren alde gero eta jende gehiago garela esango nuke, bai horixe!

Batzuk ahobizi; beste batzuk, ordea, belarriprest, baina guztiek eman dute pausua dagoeneko. Eta zu, zeren zain zaude?

Eman izena Euskaraldian

https://izenematea.euskaraldia.eus/

BARIKU HONETAN, HILAK 16, BERBALAGUN JAIA BASAURIN, BONBOI TABERNAN

OSTEGUNEKO BERBALAGUNEN ONGI ETORRI AFARIA

Urtero bezala, ostegun arratsaldeko Oñarteko berbalagunek afari bat antolatu zuten joan den ostiralean, kide berriei ongi etorria emateko.

Ikasturte honetako aurpegi berri bakarra Andonirena da, baina ostiralean Barrengorri txokoan izan zen giro itzela jendearen belarrietara heltzen bada, seguru "fitxaje" gehiago batuko zaizkiola talde beterano honi.

Izan ere, afaria 22:00ak aldera hasi zen arren, taldeko zahar zein berriek ordu bi lehenago ekin zioten Roberrek prestatutako gutiziak probatzeari. Tira, odoloste eta saltxitxei gutizia deitzea, agian, gehiegi izan daiteke, baina ez ziren denbora luzez barran egon; beraz, primeran egon ziren seinale, dudarik gabe.

Tertulia gozoan trago batzuk edaten egon eta gero iritsi zen ohitura bihurtu den menua ahoratzeko momentua. Urtero komentatzen dute beste zerbait egin daitekeela, baina saiheskia patata erre eta saltsa berezi horrekin hain gozo egonda, zertarako aldatu denen gustukoa dena?

Afalosteko giro paregabea da aldatzen ez den beste gauza bat. Aurten ere goizeko ordu txikiak arte egon dira mahai baten bueltan, dinamizatzaileak eramandako mahai-jokoen aitzakian. Kili-Kolorekin hasi eta telebistako Ahora caigo eta Scattergories-en euskarazko bertsioekin eman zioten amaiera gau borobil honi. Datorren urtean beste norbait animatzen bada, badaki zein den plana, lekua eta menua

TOLOGORRIRA IRTEERA

Oraingo honetan Urduñaldera hurbilduko gara Hego Uribeko mendi taldekoak, bertako gailur enblematikoenetako bat igotzera. Ez da igoera zaila teknikoki, hortaz, edonor etor daiteke, nahiz eta mendian ibiltzeko ohitura handirik ez izan.
Goizeko 8etan geratuko gara, Basauriko udaletxean eta kotxez joango gara Urduñara. Espero dugu, bazkalordurako bueltan izatea.
Ez ahaztu oinetako eta mendiko arropa egokia eramatea, azken finean 1000metrotik gorako mendia baita!
Praktikatu eta bizi

AZAROKO AGENDA

PRENTSAURREKO BATERATUA BASAURIN

Ostegun honetan, urriaren 25ean, Hego Uribeko berbalagun ikasturteari hasiera emango dion prentsaurreko bateratua egingo dugu Basaurin, Izarra tabernan, goizeko 11:30etan.

Prentsaurrekoan, Basauri eta Galdakaoko berbalagun dinamikako eragileok proiektuaren nondik norakoak azalduko ditugu  eta herritarrei deia zabalduko diegu izena eman dezaten.

Gainera, berbatalde baten funtzionamendua irudikatuko dugu, datozen partaideak mahaitan eserita, gai baten inguruan hitz egiten egongo baitira. Horrela, proiektua ezagutzen ez duenak ideia bat egingo du berbalagun zertan datzan argituko diona.

Gonbitea luzatzen diegu herritar, ikasle eta berbalagunei prentsaurrekora joan daitezen eta sostengua eman diezaioten beste urte batez euskararen alde eskualdean egiten den dinamika garrantzitsu honi!!

Aldez aurretik eskerrak emanez, ostegunean elkar ikustea espero dugu! Animatu, praktikatu eta bizi!!            

EREÑOZAR ETA OMAKO BASOAN MENDIBUELTA

Egun ederra izan genuen Hego Uribeko mendi-taldeko kideok aurreko igandean, ikasturteari hasiera eman zion lehen irteeran.
Goizeko 10etan ekin genion bideari Ereño herritik, apurka-apurka, aldapa pikua baitzen! Igotzen joan ahala, Urdaibai inguruko ikuspegiez gozatu genuen, lanbroak uzten zigun heinean...guzti horrek kutsu miragarria eman zion ibilbideari. Gora iritsi ginenean (argazkian ikus daitekeen moduan), lanbroa ia erabat desagertua zen, eta bizkaiako mendi esanguratsuenak begiztatzeko aukera ederra oparitu zigun egunak: Gorbeia, Lekanda, Oiz, Anboto, Sollube...
Mokadutxua jan ostean, jaitsierari ekin genion Ereñorantz, bertan kotxeak hartu eta Santimamiñeko aparkalekura abiatu ginen. Autoa utzi ostean, Omako basorantz joan ginen ibilbide zirkularra eginez. Goitik ailegatu ginen, Ibarrolaren artelan berezia ikusi, eta beheko partetik itzuli ginen aparkalekura, ordu eta erdiko ibilaldia egin eta gero.

                                 (Hego Uribeko mendi-taldea Oman)
Bukatzeko, mendi-buelta guztiek merezi duten moduan, garagardo freskoa hartu genuen Leizika tabernan, goiz polit honi amaiera emateko!! Eta noski, hurrengo mendi irteera antolatu genuen, baita egun eta lekua erabaki ere:
azaroaren 11n, igandean, Tologorrira joango gara. Gurekin etorriko??
Praktikatu eta bizi!!

SANTIMAMIÑE ETA OMAKO BASOTIK IBILALDIA

Ikasturteari hasiera polita baina lasaia emateko asmoz antolatu dugu irteera hau: lehenbizi Santimamiñe inguruko kobak ( Santimamiñe bera, Lezika...) ikusiko ditugu, eta 90 minutuko bisita gidatu baten bidez euskal kulturaren ikur adierazgarrienetakoa den leku miragarri honen sekretuak ezagutuko ditugu.
Ondoren, kobaren sarreratik bertatik ateratzen den bideari segituz, Omako baso margotura hurbilduko gara, eta Ibarrola artistaren obra "eko-modernoa"z gozatzeko aukera izango dugu.
Plan hoberik igande baterako? Zaila, ezta? Gurekin  etorri nahi baduzu eman izena lehenbailehen urriaren 15a baino lehen, lekuak mugatuak baitira!
Praktikatu eta bizi!!

URRIKO AGENDA

MATRIKULADIA ZABALIK HEGO URIBEN

Euskara praktikatu eta lagun berriak egin nahi badituzu, ez pentsa birritan eta eman izena Berbalagunen! Gurasoentzat, gazteentzat, kirolzaleentzat, parrandazaleentzat...eta gainera debalde!
Izena emateko jarri kontaktuan gurekin e-posta eta telefono bidez, edo etor zaitez Bolintxu eta Barandiaran euskaltegietara! Zuen zain gaude!
Praktikatu eta bizi!!

GALDAKAOKO JAIETAKO TOPAKETA

Udako etenaren ostean, egunerakoari martxa hartu baino lehen motorrak berotzen hasteko asmatu genuen duela zazpi urte jaietako topaketa.

Horretarako eta ikasturte berrian izena eman duen jendeari ongi etorria emateko, jakina! Aurten ere aurpegi berri bat izan dugu Iturrondoko txosnagunean eta primeran egon gara, udako nondik-norakoak elkarri kontatzen.

Gainera, labetik atera berriak ziren kanpainako kartelak eskuetan hartu eta talde argazki koloretsu bezain polita atera dugu, berbalagunak ere kolore guztietakoak direla adierazteko.

Motorrak berotuta, urrian ikusiko dugu elkar!

ITSASONTZI TAILER DIBERTIGARRIA

Uda bezperako sargoriari aurre egiteko tailerra izango zela pentsatu genuen aspaldi, baina hodeiak nagusitu dira aurten gurean, eta beste baterako utzi beharko dugu freskatzearena. Ondo pasatzea, ordea, ohitura bihurtzen ari da Gurasolagunen, eta ikasturte amaierako azken hitzorduak ezin zuen huts egin. Kortxoz eta intxaur azalaz egindako itsasontziak egin genituen lehengo ostiralean, giro ezin hobean.
Abordatzeraaaa!!!



AEK euskaltegia aukeratu dugu azken tailer hau egiteko, eta bertako terraza handian egin ditugu elkar ezagutzeko jolasak. Izan ere, ekintza guztietara animatzen da familia berriren bat, eta oraingo honetan ere harrera beroa egin diegu Veronica, Ibai eta Anderri, aulkien jolasarekin. Ondoren, kortxoa lantzeari ekin diote gure txikiek, baina aitatxo edo amatxoren begiradapean, artaziak edo labana behar izan baitituzte gauza batzuetarako.

Kortxozko itsasontzi dotoreak egin eta gero, intxaurrak husten hasi ziren, txalupa txiki bat egiteko. Plastilina, intxaur azala, zotz bat, bela egiteko papera eta irudimen apur bat baino ez da behar itsaso zabalean nabigatzen hasteko. Tira, itsasoa asko esatea da, baina igerileku txiki batean ere ederto batean pasatzeko modua dagoela ikusi genuen. Putz eta putz aritu ziren gogotsu, eraiki berri zitzuten jostailuak abiadura bizian jarri nahian.

Ekaina heldu da eta oporrak hartzeko unea ekainarekin batera. Martxoan eman genion hasiera Galdakaoko lehendabiziko Gurasolagun taldeari, eta joan den ostiralean, barre, abesti eta zipriztinen artean esan genion elkarri gero arte; urritik aurrera tailer eta lagun gehiago egitea delako guztion asmoa. Ondo pasa udan eta izan zaitezte Pirata alferrak!
"Piraton bizitza hoberena da, lanik gabe, eskolarik gabe, ron botilarekin!"

BOGA GARAGARDO DASTAKETA BASAURIN

Arratsalde interesgarri bezain freskagarria izan zen aurreko ostegunean Bolintxu euskaltegian pasa genuena. Edonori gomendatzeko modukoa baita guk geuk errepikatzekoa ere.

Tailerrari hasiera 18etan eman genion, eta argazkian ikus daitekeen bezala, lehendabizi Boga-ko Enekok euren garagardoaren ekoizpenean ematen dituzten pausuak azaldu zizkigun bideo batzuen laguntzaz: garagar alea zelan zatitu, nahasketa nola egin, tenperaturarekin zelan jokatu...

Horren ostean, garagardoa egiteko erabiltzen dituzten lehengaiak bertatik bertara ezagutzeko aukera eduki genuen; garagar mota desberdinak eta lupuloa ( garagardoa egiteko ezinbestekoa) ekarri zituen Enekok, eta mota bakoitzarekin zein garagardo ekoizten duten ederki azaldu zigun.

Eta bukatzeko, denok itxoiten ari ginen momentua iritsi zen: garagardo desberdinak dastatzeko unea, hain zuzen ere. Izan ere, bost garagardo mota desberdin ekarri zituen dastatzeko, eta banan-banan probatu genituen, garagardo bakoitzaren zapore, usain, kolore...diferenteak identifikatuz. Garagardoarekin, koloreekin bezala, norberak bere gustukoena du eta argi ikusi genuen aurrekoan ; batzuek argia nahiago; besteek beltza; beste batzuek gorria edo "afrutatua"...hori bai, guzti-guztiak modu artisanalean eginak eta bertako produktuekin. Horrek guztiak balio erantsia ematen dio Boga garagardoari, artisau eran produzitzeaz gain, Euskal Herriko produktuak erabiltzen dituztelako, horrek dakarren onura ekonomiko, sozial eta natural guztiekin.

Eskerrak eman nahi dizkiegu hurbildu ziren 28 lagunei, eta nola ez, Enekori, hain azalpen zehatz, ulerterraz eta argiak emateagatik. Munduko zorte onena opa diogu Boga kooperatibari eta espero dugu etorkizunean gure bideak berriro elkartzea!
Praktikatu eta bizi!!